Chawngtlai Welfare Committee, Aizawl chuan Chawngtlai ram zau tak mipui tana laklet a nih avangin Chawngtlai VC-te chunga lawmthu an sawi.
Thu chhuaha tarlan a nih danin – Chawngtlai Village Council chuan, Chawngtlai ram chhung – Khawzawl leh Tuipui inkar ram zau tak – Champhai kawng leh a chheh vel, phalna awm mumal mang loa mimal kuta a lut tam lutuk chu ngaimawhin, mi hrang hrangte ram neihdan enfel a nih theih nan VC-te kaihhruaina hnuaiah Village Co-ordination Committee dinin, ram enfel hna an thawk a. Ram enfel tur hian VC Minute Bu, kum 1972 atanga chhui chho tanin, khawtlang tana ram laklet a nih theih nan tehna hrang hrang pali hmangin mimal ram hrang hrangte hi an chingfel a ni.
Chawngtlai khuain thangkhat lian zet Lo atana an theh ngam tawh loh leh mimal kuta lut tawh anga mipuiin an ngaih – ram zau tak chu mipui kuta a luh leh tak avang hian kumin atan heng ram lak lette hi Lo atan theh a ni a, ram laklet hlut zawng hi Cheng tam tak man a tling a. Khawzawl leh Tuipui inkar ram chhung, Champhai kawng chheh velah hian mimal ram zau tak – Tin 100 hmun chuang, Chawngtlai mipui ram atan laklet leh a ni.
Hei vang hian, Chawngtlai VC-te hmalakna hi Chawngtlai Welfare Committee, Aizawl chuan ropui a tiin, lawmawm an ti tak zet a. Chawngtlai mite’n a ruka an ngaimawh em em leh chin fel dan awm se an lo tih ruk thin
chin fel a lo ni ta chu Zoram mipui hriatah chhuan tlak ni-a ngaiin, Chawngtlai VCP, Lalremsanga leh a thawhpui VC-te chu an chhuang tak zet tih an tarlang.
Comments are closed.