Minister hoin Annual Conference hun hmang

Get real time updates directly on you device, subscribe now.

MJA Champhai District Annual Conference vawi 33-na chu Thawhlehni khan Champhai MJA Press Club-ah hman a ni a, Chawhnu lamah Law & Judicial Minister TJ Lalnuntluanga’n a hmanpui.
He hun MJA Vice President Lalhlupuia kaihhruaiah hian Minister TJ Lalnuntluanga chuan, MJA Champhai District chu amah finchhuahtu lehatan mi pawimawh tak an nih thu a sawi a. Media-te chu mipui kaihruaitu ber pakhat an nih avangin thu belhchian dawl, kawng dik lam hawi leh kaihruai zawnga thu chhuah turin a sawm a ni.
Minister chuan- Mizoram chhunga ramngaw tichereu nasa bera Champhai District a tang ta leh za zela 64 zet tihchereu a ni chu a lungchhiat thlak tih sawiin, ramngaw siam thar leh turin he District atang ngei a bul tan a nih theih nan NEC atangin Rs. Nuai 200 project hmanga bul tan a ni dawn tih a sawi.
Mumal zawka Champhai khawpui din a nih theih nan Champhai Master Plan duan mek a nih thu leh, kum 2031 thlir chungin Survey Data-te lak zawh tawh niin Preliminary Survey pawh zawhfel tawh a. Hripui leng vanga intodelh pawimawh zia lo langte chuan Leilet Phaizawl humhalh a tulzia a entir a ni, a ti a. March 2021 ah Champhai Master Plan
peihfel tum a ni, a ti bawk.
Minister tawiawmtu Champhai DC Maria CT Zuali pawhin Journalist te chu mipui leh sorkar hnathawktu leh sorkar kutke ber an nih thu leh, MJA Champhai District ten sorkar Department tana an hmalak thinna chu fakawma tih thu a sawi a, theihtawp chhuahho zel turin a sawm nghal bawk.
Chawhma lamah District MJA inrelbawlna lam hawi rorelna hun hman a niin, President Lalhmingmawia Pachuau kaihhruaiah hian kumin chhunga MJA hmalakna tur peng hrang hrang : Chanchinbu chawlh hunbi, Press Tour neih dan tur leh sorkar-in hmasawnna hna a thawhte tlawhchhuah bakah pawl chungchang pawh rel a ni a.
Chanchinbu chawlh hunbi atan – Republic Day, YMA Day, Chapchar Kut leh Independence Day te chu an ruat a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More