MIPUI HARSAT HLAUH VANGIN MST BUS TLAN TIR

Get real time updates directly on you device, subscribe now.

Champhai – Aizawl Maxi Cab Service Owners’ Association te leh kawng siamtu company te inkara inhmuhthiam lohna a awm avanga mipui ten veivahna chungchangah harsatna an tawh loh na turin Aizawl – Champhai inkarah vawiin ni 14.4.2022 atangin MST Bus Service tir a nih tur thu Transport Department chuan nimin khan order an tichhuak.
Ni 14.4.2022 ah hian Aizawl booking office, near Vanapa Hall atangin zing dar 6-ah MST Bus pahnih a chuak ang a, hemi hnu atang hian Aizawl leh Champhai atangin pakhat ve ve a chhuak thin ang.
Nimin vek khan Champhai DTO R.Lalnunkimi chuan hemi chungchangah hian hriattirna a chhuah ve nghal bawk a. Champhai leh Aizawl inkara Maxi Cab service ten tiamchin awm loa service an tih tawp rih avangin Transport Deptt. chuan, mipuiin harsatna an tawh loh nan, Aizawl leh Champhai inkarah MST Bus Service tir a tum a. Tunkar
Inrinni atangin, Pathianni tih loh nitin Champhai leh Aizawl inkarah MST Bus chu zing dar 6:00 ah CHANEM tual atangin a chhuak thin ang. Bus Ticket hi vawiin, 14.4.2022 atangin zing dar 9:00 atanga tlai dar 5:00 inkarah DTO Office, Kahrawt atangin a book theih ang. Deluxe Bus ticket man hi Rs. 388 a ni tih a tarlang bawk.
Champhai leh Aizawl inkar Maxi Cab Service Owners’ Assn leh kawng siamtu company inkara inhmuhthiam lohna awm avangin, mipui veivahna tur lirthei a khaihlak loh nan ruahmanna siam a nih tur thu, Transport Minister TJ Lalnuntluanga chuan a lo sawi tawh a. Champhai leh Aizawl inkara Maxi Cab Service ten
vawiin atanga tiam chin awm lova nawrh kalpuia, an Service an titawp dawn a nih chuan mipui tawrhna a thlen lohna turin Mizoram State Transport Bus chu Champhai leh Aizawl inkarah tlan tir a ni ang tih Tuipui khawtlang hruaitute hmaah nimin zing khan Minister hian a sawi.
Champhai – Aizawl Maxi Cab Service Owners Welfare thuchhuah tarlan dan chuan, an member pakhat chu thla hlui ni 29 khan Khawzawl Tuisen phai leh Khuai lui inkara Highway kawng laitu ten lung an tih tlak avangin chhiat a tawk a.
Hemi chungchangah hian tun thlenga kawng laitute leh Lirthei neitute hi an inrem thei lo va. Company thuneitu ten an intiamna anga hmalakna a awm loh avangin Lirthei neitute hi Court ah kal se, an thlawpna lantir nan Champhai – Aizawl Maxi Cab Service Owners Welfare chuan tukin zing kar atangin inremna a awm hma chuan Service loh ni se tiin thutlukna an siam.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More