MIPUI LEH THAWKTUTE AVANGIN CHAMPHAI DINHMUN MIZORAM AH THA

Nimin khan Govt. GM High School ah World Malaria Day 2022 pualin hun hman a ni.
He hun hi HT Vanlalsawma, Principal chuan kaihruaiin, Dr. R. Lianmawia, CMO hnen atangin thusawi ngaihthlak a ni. Dr. R. Lianmawia, CMO chuan Malaria chu thosi Anopheles in a put darh thin a nih thu sawiin, chung thosi laka kan him chuan Malaria lakah kan him dawn tih sawiin, in leh a vela thosi inthlahpun theihna tur, tui tling te awm lo tura in leh a vel tihfai a pawimawh tih a sawi a. Kan tui dahkhawlna pawh a chung khuhna siam a pawimawh, a ti a.
Champhai District chu tun dinhmunah Malaria vei tlemna a ni mek chu lawmawm a tih thu sawiin, thawktute thahnem ngaihna bakah mipui thawhrimna leh thuawihna vanga hetiang dinhmun hi thleng thei kan ni tih a sawi a. Kum 2015 atang khan Champhai District chu Malaria tlemna District kan nih avangin thosi hlo, DDT kah a ngai ta lo chu lawmawm a tih thu sawiin, mipui tanrualna rah kan sen mek a ni, a ti.
CMO chuan Dengue chungchang pawh sawi langin, Dengue vang hian khawvelah mi tam tak an thi tawh tih sawiin, Champhai District ah erawh Dengue vei an la awm lo ni-a hriat a ni, a ti a. Dengue te hi Malaria hrik pai Anopheles te puh darh ni ve tawh lovin, Thosi tial, Aedes thosi an tih te chuan an pu darh thin tih a sawi a, heng thosi pahnih te hi mihring tan thihna hial thlen thei tu an nih avangin an lakah kan him theihna tha ber chu thosi len zar that a nih thu a sawi a. Sub-Centre ah thosi len te thosi hlo hmanga chiah thin turin zirlai te a chah a; anmahni bakah an theih ang ang a hrilh darh hna thawk zui turin a sawm a. Thosi natna hrik pudarh chi te laka kan him chuan Malaria leh Dengue lakah kan him thei dawn a. Champhai District atanga Malaria umbo a nih a, Dengue laka inven chhunzawm zel chu an tum ber a nih thu a sawi bawk.
He hunah hian Lalhmingmawii, DVB Consultant kaihhruaiin Malaria lam hawi lemziak inelna buatsaih zawh taka lawmman te sem chhunzawm a ni a. Vanlalrinawma, PES chu pakhatna a ni a. B. Lalawmpuia, PES chu pahnihna niin, R. Lalpekhlua, PES leh Brenda Lalhluzuali, Govt. GM High School te chu pathumna an ni. Anni bakah hian a ti tha zual 10 thlanchhuah te hnenah Consolation prize hlan an ni bawk.