Source: *LENRUAL DAILY*
Nimin khan Govt.Hrangbana College zirlaite chuan an College a Zirtirtu 6 sawn chhuah an nih ruala an hmunruak hnawhkhah na tura zirtirtu 3 chauh dah luh an nih avang leh an College ah zirtirtu indaih lohna phuhruk tura sorkar nawrna atan lungawilohna an lantir a, chumi denchhen chuan College zirlaite chu Sit-in demonstration neiin Chanmari kawn ah an pungkhawm a ni.
Zirlaite hian muanawm tak, midang tibuai miah lova lungawilohna an lantir theih laiin lirthei chevel leh mipui nawlpui tibuai thei zawngin mi thenkhatin hma an la a, Aizawl khawpui lun lai tak ni phak, Chandmari kawnah Lirthei kal vel nasa takin a buai a, traffic Jam nasa avangin mipui tam takin harsatna an tawk a ni.
Hmanni lawk khan Kolasib tlangdung-ah mi thenkhatin Compensation an hmuh tur an hmuh har avangin Sorkar nawrna atan an lungawilohna an lantir a, Mizoramin chakkhai a lak luhna pawimawh ber Aizawl leh Silchar inkar kawngpui an dang tawh bawk a. Heng chet dan tha lo tak hian mipuite tan harsatna a thlen thin a ni.
Tunhnaiah Govt.Champhai College a zirlaite chuan Commerce Building satuten an sak zawh har lutuk avanga harsatna an neih thin avangin Sorkar nawrna atan Champhai khawpui lun lai berah lungawilohna lantirin Sit-in demonstation an huaihawt a, lirthei kal vel leh mipui chetlakna tibuai miah lovin hma an la a, Sorkarin an lungawilohna te chu hriain District thuneituten hma an lak sak nghal a ni.
Pawl hrang hrangin lungawilohna hi an lo lan tir tawh thin. Badge dum inbel te, pendown strike te, Sit in demonstration te, kawngzawh te, chawngheia sorkar nawrte an lo huaihawt tawh thin. Sorkar nawrna atana lungawilohna kan lantir hian mipui tibuai lo leh Sorkar building leh thil tha awmsa tichhe zawng a hmalakna hi thil tul lo tak a ni a, mipui zahlohna a tling a, pumpelh daih atan a tha.
Comments are closed.