India ram zalenna kum 75 tlin lawmna ‘Azadi Ka Amrit Mahotsav (AKAM)’ denchhenin Champhai-ah Marathon leh Cycle Rally buatsaih a ni.
Mizoram Sawrkar Planning & Programme Implementation Department leh DC Office Champhai tangkawpin nimin zing dar 6:30 khan Champhaiah Marathon intlansiak leh Cycle Rally an buatsaih a. Mipui tam zawk an tel theihna tur tinzawna buatsaih hi District Bawrhsap James Lalrinchhana chuan a vailiam a ni.
Hawnna hun tawi Chhangphut Field-a neihah khuallian District Bawrhsap James Lalrinchhana chuan, Azadi Ka Amrit Mahotsav chu India ramin zalenna a hmuh kum 75 tlin puala hmasawnna hrang hrang, scheme leh history tarlan bakah, zalennain mipui hnena chakna a pek hriatrengna leh lawm nana siam a ni, a ti a. India ramin hmasawnna rahbi zawha bung thar a kai theihna tur te, keimahnia chakna leh theihna awmte tichaka mahni intodelh, Atmanirbhar Bharat siam tuma theihtawp chhuah mek zel a ni, a ti. Fit India Movement hnuaia tanlak ngaihnate sawiin, taksa leh thlarau hrisel leh hman tlak nei thei turin insumtheihna leh nunkawng hrisel zawh a tul tih a sawi bawk.
He hun kaihruaitu DSYO Champhai Lalnunfela Chawngthu chuan, marathon race leh cycle rally buatsaih chu intihsiakna ai mahin zalenna hlut zia leh India ram hmasawnna leh scheme pawimawh te inhrilhhriatna nen mipui telna zalenna kum 75 tlin lawmna puala buatsaih a ni, a ti a. Kalkhawmte lawmna thu sawiin tlan dan tur a sawifiah nghal a ni.
Marathon intlansiak hi Higher Secondary School leh College zirlai te puala buatsaih a ni a. Girls category-ah Malsawmkimi, 4th Semester BA, Govt. Champhai College chu pakhatna a ni a. Lalrinzuali, 2nd Semester BA Govt. Champhai College chuan pahnihna a ni a. Lalhmingmuani, Class XII, Sec A, Govt. GM Higher Secondary School chu pathumna a ni. Boys category-ah Lalengtluanga, 2nd Semester BA, Govt. Champhai College chu pakhatna a ni a. C.Lalthlamuana, Class XII, Sec C, Govt. GM Higher Secondary School chu pahnihna niin; Kapzamuana, 4th Semester BA, Govt. Champhai College chu pathumna a ni.
Cycle Rally a tel Champhai District Cycling Association hnenah participation prize pek a ni bawk. Lawmman pakhatna hian ₹ 2,000; pahnihnain ₹ 1,500 leh pathumna hian ₹ 1,000 theuh an dawng a, lawmman hi DSYO Lalnunfela Chawngthu chuan a hlan a ni.
Nimin Marathon Race cum Cycle Rally-ah hian marathon tlan turin Govt. Champhai College zirlai 30; Govt. GM Higher Secondary School zirlai 77, an vaiin mi 107 te an tel thei a. Cycle Rally-ah hian Champhai District Cycling Association member 11 an tel bawk.
Comments are closed.