November ni 29 atanga December, 2021 thleng awh tur Road Safety Week vawi 40-na hawnna inkhawm hi Pu K Lalhmachuanliana, President, ZDU, Sub-Hqrs, Champhai chuan a kaihruaia, Khuallian Pi R. Lalnunkimi, DTO, Champhai chuan Road Safety Week 2021 hi a hawng a ni. Khuallian chuan mitin kan himna hi a pawimawh a chumi atan chuan tunge mawhphur tih kan ngaihtuah chian angai a ni tiin, tun ang hun hi a tlangpuiin lirthei chetsual tam hun ani fo a, hetiang huna kan himna tura Road Safety Week hman ani hi a lawmawm hle ani a ti a.
Kan himna atan hian Police te mawhphurhna mai piah lamah hian mitin mai hian tihtur mawhphurhna kan nei a, kawng sira bungrua kan dah duhdan te, Department in license a pek danah te, lirthei khalh danah te keimahni zawn theuhah fimkhur tur leh midangte tan a him em tih ngaihtuahin kawng siamtu te pawh hian kan him tlanna atan mawhphurhna an nei tih hriat a tul ani a ti a.
Kum tlinglo lirthei khalh tir fo te hi kan him tlanna atana pawi thei anih mai bakah nu leh pa ten kan fate himlo dinhmunah kan dah a ni tih kan hriat a tul ani tiin ZDU in hetiang hun an buatsaih hi tun atan tawp lo sela kan hun lokal zel tur atan kan himna hi i ngaipawimawh zel ang u, a ti bawk a ni.
He hunah hian Chairman, Pu K. Lalhmachuanliana, President, ZDU, Sub-Hqrs., Champhai pawhin thu sawiin he Road Safety Week hian rah tha a chhuah ngei a beisei thu a sawi a, lirthei khalhtu leh mipui te pawhin Road Safety Week a ni tih hria ila, fimkhur lohna avangin ramtui leilo a awm tam tak an awm tawhin nunna chan tamtak an awm tawh a ni tih hria ila, keimahni ah fimkhurna rilru kan put a ngai a ni tiin mi tam tak ten lirthei khaltu te sawisel thin mahse vawiin thlenga Zoram Drivers Union te hmingchhe lutuk lo a kan awm hi Pathian min hruaina a ni tiin lirthei khalhtu te fimkhurna vawng reng turin a chah bawk a ni.
Hun hman zawh anih hnu hian lirthei tlan te chu tidingin Road Safety Flag te Rs. 20/- a lei tir zel an ni.
Comments are closed.