MIZO HMING HAWHIN CHAMPHAI-AH VAI-IN RAM NEI

Get real time updates directly on you device, subscribe now.

Nimina Champhai Bawrhsap Maria CT Zuali hova Champhai zawla WRC humhalh chungchang ngaihtuaha thutkhawmah, Champhai Zawla Kudam leh Infrastructure awm zingah Hnam dang (Vai) sumdawngin Mizo hmingin hmun an lei nia hriatna a awm thu an sawi.
Nimin khan Champhai DC Maria CT Zuali hovin Champhai zawla WRC huam chhung humhalh chuangchang sawihovin Settlement Officer, Land Revenue & Settlement Dept, Champhai NGO Coordination Committee leh Champhaia Nature Conservancy te chu DC Conference Hall-ah an thukhawm a. Meeting-ah hian Settlement Officer, Land Revenue & Settlement-in Champhai zawla WRC huam chhung teh that leh a nih dan a tarlang a. Kum 1984 Notification atanga a lan dana WRC huam chhunga Hectare 615.41 a zau atangin tun dinhmunah Hectare 22.05 chu WRC ni lo thildang atana hman tawh niin, tun dinhmunah Hectare 593.36 a zau WRC a la awm tih tarlan a ni.
Thukhawm chuan a hmunah kala chiang zawka enfiah leh nise tiin a rel a; March ni 25, 2021 a Chief Minister in a lo sawi tawh ang leh, EF&CC Minister hova meeting-in an sawi ang bakah Mizoram Sorkar a Land Revenue & Settlement Dept. in hriattirna a chhuah angin Champhai zawla WRC pass te humhim tura hmalak zel ni se tiin an rel bawk.
Champhai zawl WRC huam chhunga thlai emaw buh emaw chinna atan ni lova kutthlak mekte hnenah chhunzawm tawh lo tura lehkha pek an nih tawh thu leh, vaukhanna lehkha pawh pek tawh an ni tih tarlan a ni a. Hetih lai hian chhunzawm reng an la awm tih sawi lan a ni a; WRC Pass chu LSC pangngaiah leh theih a nih loh thu leh Agriculture LSC pawh ni se, insak theihna dan a awm lo tih tarlan a ni bawk.
Thutkhawmah hian Champhai zawla Kudam leh Infrastructure awm zingah Hnamdang (Vai) sumdawng hoin Mizo hmingin hmun an lei nia hriatna a awm tih tarlan a ni a. Hnamdang kuta kan ram a luh lohna tur leh Kudam sak a nih lohna tura a humhalh dan tha ber chu Hnamdangin kut an thlak theih lohna turin buh chinna atana hman ngar ngar a ni tih sawi lan a ni bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More