GIG Motors 20th MFA Cup-ah Champhai club FC Vengthlang North chuan Kanan FC 1-0 a hnehin an champion. Keifang Centenary Football Ground-a inkhelah Champhai tlangval Laltlanzova’n goal awmchhun a khung.
Kum 2017 khan Bethel FC chu MFA Cup-ah an champion a, kum nga hnuah Champhai club-in district hrang hrang inelna MFA Cup-ah champion nomawi an chawi leh chiah. Vengthlang North hian fairplay award an dawng a, captain Lalramsanga chu best player-ah thlan a ni bawk.
Champhai an țha Aizawl champion Kanan FC-ah hming langsar an tam a, Mizoram tana feh chhuak tawh an awm nual. Champhai lam erawhin training an nei tha a, Chhangphut Field-ah thla khat chhung an training a, a tawp lam kar khat an riak lut.
Khelmual chhungah Vengthlang North-in training an neih that an pholang a, țan phat ațangin inkhel an thunun. Midfield laia awm captain Ramsanga a langsar a, ball sang a lak deuh vek bakah ball tha a pe chhuak bawk.
First half-ah Champhai an chungnung a, Kanan tlarhnung an rim hle. Champhai foward R. Ramdinthara’n chance tha a nei a, Lalsawmzela pawh a hnawksak hle. Kanan erawhin chance an nei meuh a, wing back Lalremruata’n crossbar a pet per thung.
Second half țantirhah Aizawl champion hi che tha mah se chak phu zawk Champhaiin hnehna an chang.
Minute 80-naah Champhai winger Sawmzela cross duhthusam chu Laltlanzova’n a tauh goal a, goal dang a luh belh lo. Keifang Centenary Football Ground-a inkhel entu hmaah Champhai club leh anmahni țantuten champion an lawm.
Champhai manager H. Vanlalpeka chuan, “Kan fitness a tha zawk a, inkhelah pawh kan а, chungnung zawk. Kan khelh dan thlir chuan goal khat aia tam khung thei tur kan ni. Kan result avangin kan lawm takzet a, kum 2017 hnua Champhaia MFA Cup nomawi kan hawn leh thei hi kan lawm a ni,” tiin Vanglaini a hrilh. FC Vengthlang North hi Champhai DFA-in an buaipui a, an hlawhtlinna hi DFA hnathawh a tih theih. Champhai manager chuan, “Thla khat bawr vel kan training a, a tawp kar khat kan camp bawk.
“Coach PC Lalmuanpuia leh player-te an fakawm. Inelna tha taka buatsaihtu MFA leh tha taka min thlengtu Saitual DFA chungah lawmthu kan sawi,” tiin a sawi. Champhai ațangin mi thahnem takin inkhel en turin Saitual an pan a, Champhai manager hian mahni sum senga inkhel en tura feh chhuakte chungah lawmthu a sawi bawk.
Champion FC Vengthlang North Rs 1,00,000 +
Trophy
Runner Up Kanan FC Rs 50,000 + Trophy
Fairplay FC Vengthlang North Rs 10,000
Best Player Lalramsanga Rs 5,000+ Trophy
FC Vengthlang North
Top Scorer Jeremy Laldinpuia (5 Goals) Rs 5,000 +
Trophy
Electric Veng FC
(Source : Vanglaini)
Comments are closed.