Champhai leh Zokhawthar inkar World Bank sum Cheng Vaibelchhe 138 senga M/s Tarmat Construction Company in kum 2014 atanga a laih tan, vawiin thlenga la zawh fel loh chu nimin khan Mizoram PWD Engineer in Chief Er. Henry hova enfiah a ni a. Geo-technology hmanga Vawmkawlui Box Culvert siam, kawngpui min chhia siam that leh dan tur enfiah nghal.
Champhai leh Zokhawthar inkar Km 27 a thui Double Lane-a siamah hian Champhai atanga Melbuk thleng chu kawngpui awmsa laihzauh a ni deuh vek a, Melbuk atanga Zokhawthar inkar Km 7 a thui chu kawngpui thar sial a ni thung a. Melbuk ram chhunga kawngpui siam tharah hian kopang leitawlh a tam bakah Geo-technology hmanga Dil lui leh Vawmkawlui Box Culvert chu lirthei zawh theih lohin a min chhia a. Dil lui Box Culvert chu siam that mek a nih laiin, Vawmkawlui Box Culvert, meter 65 a thui, meter 38 a sang min chhe ta chu siam that mai theih a ni a, Mizoram State suma siam a tul tawh avangin PWD hotute chuan uluk takin an enfiah.
Engineer in Chief Henry-a chuan Box Culvert cheithat ai chuan a bulah rinawm leh tha zawka siam dan ngaihtuah a ni tih sawiin, kawngpui cheithat a nih chhunga lirthei kalten harsatna an tawh loh nan Melbuk leh Zokhawthar inkar PWD kawng (State highway) chu cheithat a ni dawn tih a sawi a. Kawngpui tha leh rotlinga siam a nih ngei theih nan PWD chuan theihtawp a chhuah dawn thu a sawi. He kawngpui hi cheithat ngai a la tam avangin Contractor M/s Tarmat Construction Company sum dawn tur eng emaw zat chu PWD hian a hrensak rih dawn a ni.
Nimina PWD hotuten kawngpui an enfiah hi Champhai District NGO Co-ordination Committee hruaitute leh Melbuk VC ten an tawiawm a. Khawchhak tlangdung mipui harsatna sutkian a nih thuai theih nan World Bank kawngpui leh National Highway No. 6 double lane siam mekah chak taka hmalak sak turin NGO hruaitute chuan an ngen a ni.
Engineer in Chief Henry hi Chief Engineer Bowman; SE Lalrinkima PIU; SE Vanlalchhuana, Eastern Circle; SE Hrangthanga, E-in-C Monitoring; SE Lalzarliana, Road leh EE te bakah Tarmat Construction Company-a thawktuten an tawiawm a ni.
Comments are closed.