MIZORAM FOOTBALL CHAMPION TEAM ROPUI TAKA HMUAH A NI

Get real time updates directly on you device, subscribe now.

LBS Suzuki All Mizoram Inter Village Football Tournament 2022 khelh zawh taka Champion, Kanan VC Team chu nimin khan Champhai ah ropui taka lo hmuah an ni.
Champion team te hi Chalbawiha Junction Khankawn Police Check Gate ah lo hmuah niin, Kanan branch MHIP leh YMA in parthi awhtirin pangpar an lo hlan a. Zotlang lam atanga kalin Champhai khawchhung fanpui an nih hnuah PD Sena Hall ah Lalthansanga, VCP kaihhruaiin Champion Team te hmuahna hun hman zui a ni a, hun remchang hmasa berah Champion lawmna ruai buatsaih a nih tur thu a sawi a, lawmpuina Cake zai a ni.
He hunah hian Kanan All NGO aiawhin Upa Thangchhingpuia hnen atangin Tournament khel tura Player te tan, NGO bakah Kohhran thlenga hma an lak dan ngaihthlak a ni a. Champhai District Sports Committee leh Mizoram Football Association aiawhin Lalnunmawia chuan Champion lawmna thu sawiin, MFA Executive committee chuan LBS Suzuki All Mizoram Inter Village hi Zoram khawvel a ball pet thiam hai chhuahna tur leh, Mizoram-a Tournament lian ber MPL atan te, I-League leh ISL thlengin inkhel thiam haichhuahna ni turin, sawiselna karah Tournament hi buatsaih a nih thu a sawi a. Tournament khelh zawh taka Champion Team an nihna chu tawpna atan hmang lo va, bul tanna thar atan hmang turin Player te a chah a. Kumin chhunga MPL, ISL leh I-Leaque lo awm turah Player eng emaw zat chu an lut dawn tih a sawi a, chumi atan chuan Player te lo inpuahchah lawk turin a chah a; District Sports Committee aiawhin lawmpuina thuziak a hlan nghal a ni.
He hunah hian Champhai District Football Association aiawhin C.Hualrikhuma leh Champhai All NGO aiawhin Lalhmachhuana ten lawmpuina leh fuihna thu an sawi a. Kanan VC Team Manager Lalchhandama hnen atangin Report ngaihthlak niin, Kanan Presbyterian Kohhran Hmeichhia in lawmpuina parthi leh thilpek an hlan bawk.
Champhai South Bialtu MLA leh Minister TJ Lalnuntluanga chuan Nilaini tlai khan LBS Suzuki All
Mizoram Inter Village Football Tournament a champion team, Champhai Kanan Veng VC Football team te chu Aijal Club ah zanriah a buatsaihsak.
Minister TJ Lalnuntluanga chuan Mizoram State Games, 2019 ah a bial, Champhai South mipa football Team ten No Mawi an lo chawi tawh a. MFA Cup ah Champhai Vengthlang North in No mawi an hawn leh tun tum Inter Village football inelnaa Champhai Kanan Veng VC Football team te, khaw hrang hrang 204 zinga champion lallukhum an khum thei chu lawmawm a tih thu a sawi a. Champhai thalai infiam mite a chhuan thu sawiin, tumruhna leh taihmakna nen, Zofate hming timawitu ni thei tura theihtawp chhuah zel turin a fuih bawk a ni. Minister hian Sialhawk VC Team te hnenah tawrhpuina Cheng 7000 a lo hlan tawh bawk.
Champion lawmpuina hun hi ISL Club neitu Varun Tripuraneni-a’n a telpui a. Zaithiam, Vanlalhlana leh Lalawmpuia (OPA), Tribal Power frontman ten zaiin kalkhawm te an awi a ni.
Hetihlai hian Champhai North bialtu MLA Dr.ZR.Thiamsanga chuan, Champion No mawi rawn hawntu, Champhai Kanan VC team, Champhai ti hmingthatute hnenah lawmpuina Rs. 10,000 a a hlan a. Hemi hnu hian Pahnihna ni ta, Sialhawk VC Team hnenah tawrhpui nan Rs. 5000 chu an bialtu MLA, Dy Chief Minister Tawnluia hnehah a hlan bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More