NorthEast Regional Sports Week Manipur-a neih mekah Mizoram aiawha kal, Champhai Football Team chu Semi-final ah a thlengtu Manipur lakah 2-1 in an vanduai a, Final an inhlangkai zo ta lo.
Mizoram State aiawha kal Champhai Team hian an match hmasa berah Sikkim chu si 3 faiin an hneh a. Hemi hnu hian Assam lakah 1-0 in an vanduai a, nimin khan semi final-ah Manipur lakah an vanduai. Thu dawn danin nimin Manipur nen an inkhelh tum hian, Referee hi Manipur mi vek niin, Mizoram hian vawi 3 lai penalty an chawi a. Vawi khatna hi Manipur lamin an nghawk tluk, Lalnunmawia’n ball kal a khawih fuh palh vanga Red Card pek niin, Manipur hian penalty an hlawh chu goal-ah an khung a; hemi hnu hian sawizui hlawh takin Mizoram hian penalty tum hnih an chawi zui leh bawk. Mizoram tana goal awmchhun hi Jessy Lalmawizuala khung a ni.
Mizoram aiawha khel tur hian Champhai team, MFA Cup champion team hi chawpchilh takin MFA chuan a ko a. Ni 2 chhung lek inkoh khawm leh inbuatsaihna hun awmin, MFA Cup-a champion team player pawh koh kim hman ni tawh lo. Hun chep tak karah MFA ngenna ngai pawimawhin Champhai team hi Mizoram aiawh hian an fehchhuak ta niin thu dawn a ni bawk.
Comments are closed.