MPCC President Lalsawta chuan, sorkar tha siam turin Congress party lo chu a awm lo tih a sawi a. Tang Puihna chu Sorkar flagship Programme awm tawhte nen a inan loh thu leh sem a nih ve dawn loh thu a sawi.
Khawchhak tlangdung fanga hun hmang mek, MPCC hruaitute chuan nimin khan Champhai Bethel Vengah hun an hmang a. Lalsawta chuan Mizoramin a mamawh ber chu sorkar tha a nih thu sawiin, Zoram dinhmun chingfel tur leh harsatna a tawh mekna atanga tal chhuaka, ram nuam siam turin congress party lo. chu an awm chuang lo a ni, a ti a. Sorkarna an chang thei a nih chuan hawn a nih atanga vawiin thlenga a nih dan tur anga la kalpui loh Polytechnic building chu bul tan leh tum a nih thu a sawi a. Indo Myanmar border trade chu mumal taka kal tir a, mi tam takin dan anga eizawnna leh sumdawnna an kalpui theihna turin tun aia changtlung zawk, tangkai leh lian zawka kalpui tum a nih thu a sawi bawk.
Champhaiah Auditorium sak a nih tur thu sawiin an sorkar hmasak a, Cheng Nuai 1500 senga sak tura ruahmanna kal tawh chu sorkar tharin hmun dangah an suan ta daih nia a hriat thu a sawi bawk. Lalsawta chuan Mizote hi sawichhiata kan awm lohna turin. engtin nge a tharin kan indin leh ang tih hi kan ngaihtuahna lian ber a ni a. Congress-in a kalpui tur Tang Puihna hmangin kan dingchhuak ngei dawn a, ram rethei kan ni rei tawh dawn lo, a ti a. Tan nachang hre lo te pawhin tanna chang an hriat theihna turin kan pui dawn a. Kan ram a dinchhuahna turin tang puihna hian mi zawng zawng a kep vek dawn a, Loneitu leh kut hnathawkte bakah Lehkhathiam hna hmu lote pawh puih a ni dawn, a ti.
Lalsawta chuan zawhna chhangin Tang puihna chu Sorkar flagship Programme awm tawhte nen a inan loh thu sawiin, sem a ni ve dawn lo tih MPCC President chuan a sawi bawk.
Comments are closed.