MIZORAM SOLAR PROJECT LIAN BER NAKKUMAH HAWN BEISEI

Get real time updates directly on you device, subscribe now.

Mizorama Solar Project kalpui zinga lian ber, Power Mega Watt 20 pe chhuak thei tur Vankal Solar Park chu nakkum 2022 kum tawp lama zawh fel theih beisei a ni.
Vankal Solar Park hi kum 2018 atang khan thawh tan a ni a. P&E Department lamin an thawh tur 132/33 kV Sub-Station chu zo fel tawhin, Sub-Station-ah hian Power
Transformer 12.5 MVA pahnih hman a ni a. 132 kV Double Circuit Line pawh
hman ni tawhin, Saitual lam atanga 132 kV Line rawn chho pawh Vankal Solar Park-ah hian lutin, Solar Park zawh fel a nih hunah Power a pek chhuah te chu 132 kV Line hmang hian pek chhuah a ni ang.
Vankal Solar Park a hman tur Solar Plate te chu China siam hman a ni dawn a, Solar Plate te hi nakkum January thla tawpah emaw February thla tir lamah emaw Kolkota Lawng Chawlhnaah phurh thlen hman beisei a ni a. Solar Plate a thlen a, harsatna a awm lo a nih chuan Vankal Solar Park hi thla 5 chhung vela zawh fel theih beisei a ni a. Vankal Solar Park-a mi tur hmanraw phurh luhna tura kawng chungchanga harsatna awm pawh PMGSY hnuaia kawng thar laih chu tunah hian hman theih tawhin harsatna lian ber Tuimaru Lei erawh zo turin hun a la duh deuh avangin kawng hlui hi Solar Plate phurh luhna atan chei leh tum mek a ni.
Vankal Solar Park hi Bialtu MLA L.Thangmawia chuan Ningani tlai dar 3:00 khan a hmunah kalin a tlawh a. MLA hi P&E Department aiawhin Er. K.Duhsanga, E.E. P&E (Khawzawl) leh Er. Lalhmingthanga S.D.O. P&E (Ngopa) te chuan an lo dawngsawng a. Er. K.Duhsanga, E.E. P&E(Khawzawl) chuan Vankal Solar Park a hnathawh dan tlangpuite MLA hi hrilhin, MLA hian tih theih a neih te leh a tul anga hma la tura a inhuam thu a sawi a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More