𝗠𝗟𝗔 𝗹𝗲𝗵 𝗠𝗶𝗻𝗶𝘀𝘁𝗲𝗿 𝘁𝗲 𝗖𝗵𝗮𝗺𝗽𝗵𝗮𝗶 𝗗𝗶𝘀𝘁𝗿𝗶𝗰𝘁 𝗺𝗶𝗽𝘂𝗶 𝘁𝗮𝗻

Champhai District chhunga Covid-19 hripui leng vanga chhungkaw harsa leh tanpui ngaite tan Bialtu MLA leh Minister ten tanpuina sem chhuakin, khua leh veng hrang hrangah tanpuina sem chhunzawm mek a ni.
MOT Chairman Dr. ZR Thiamsanga, Champhai North bialtu MLA chuan Covid-19 hripui avanga inkharkhip kalpui mekah a bial chhunga chhuanchham an awm thulha pek chhuah turin a bial chhunga VLTF hrang hrangte hnenah Buhfai a hlan a. Nimin khan Champhai North Block I MNF te chuan an huamchhung veng 13 bakah Home pahnih TNT Mazuia Home leh Gosen Home-ah te buhfai hi an sem chhuak nghal a. Vawiinah
Champhai North Block II MNF te’n an huamchhunga VLTF te hnenah an sem chhuak ve leh dawn a ni.
Champhai North bialtu MLA, Dr ZR. Thiamsanga hian Covid Care Centre-a hri kai enkawl mekte tan Apple leh Avocado a lo pe tawh a, a bial chhunga khaw 8 hnenah Oxygen Concentrator 1 theuh a lo pe tawh bawk.
Champhai North Block-I huam chhunga buhfai semchhuah hi F. Lalherliana, Block Secretary hova sem chhuah niin, Thalai Block President KL. Zairemmawia, Treasurer Lalmalsawma leh Secretary Lalfakmawia ten an tawiawm a ni.
Champhai South Bialtu MLA TJ Lalnuntluanga, Law & Judicial Minister pawhin tunhnai khan a bial chhunga chhuanchham awm palh thulha mipui hnena sem chhuah turin Buhfai ip eng emaw zat Champhai-ah a rawn pe chho bawk a. Nimin khan buhfai hi Zokhawtharah pawh mipui harsa zual tan sem chhuah a ni a. Social Welfare Minister Dr. K. Beichhua chuan ama
mimal suma a lei, buhfai chu nimin khan Champhaia ruihhlo ngaite enkawlna hmun, De-Addiction Centre 4 – Mazuia Memorial Home (TNT), Reformation Centre, Emmanuel After Care Centre leh Grace Receivers’ Home-ah te harsatna zualpui phuhruk nan pek chhuah a ni. Buhfaite hi De-Addiction Centre tin tan Quintal 1 theuha sem niin, Minister aiawhin Zothanmawia Hnamte, CDPO Champhaiin an hmun theuhah kalin a hlan a ni.
East Tuipui Bialtu MLA, Ramthanmawia (Papuia) pawhin a Bial chhung Ration la ve thei lo mi harsa leh raltlan te Buhfai ei tur eng
emaw zat a thawn chhoh chu nimin tlai lam khan Khuangleng thlenpui a ni tawh bawk tih thu kan dawng.
Nimina Champhai North bialtu MLA in buhfai
a sem chhuah chu :-
1. Vengsang VLTF – Ip 5
2. Kahrawt VLTF – Ip 5
3. Vengthlang VLTF – Ip 5
4. Vengthlang ‘N’ VLTF- Ip 5
5. N. Khawbung VLTF – Ip 4
6. Hmunhmeltha VLTF – Ip 4
7. Ngur VLTF – Ip 4
8. Zote VLTF – Ip 4
9. Aiduzawl VLTF – Ip 4
10. Rabung VLTF – Ip 4
11. Tualpui VLTF – Ip 4
12. Ngaizawl VLTF – Ip 4
13. Neihdawn VLTF – Ip 4
14. TNT, Mz Home – Ip 12
15. Gosen Home – Ip 2