Pu Lalhmingmawia Pachuau, Executive Member, MNF General Hqrs. chuan, “Martar-te thih chhan Mizoram leh hnam tan anihna angin zahna chibai ka buk a, an sulhnu an hnutchhiah te thangthar ten an hnungzui a an hmabak chhunzawm a kalpui zel turin mitin te leh helai hmuna kalkhawmte ka sawm che u a ni,” a ti.
MNF Party in kum 60 a tlinna Diamond Jubilee chu Champhai North Block and South Block MNF bultumin CHANEM kawt Martar-te thlanah nimin zing khan hman a ni a. Lawmna inkhawm hi Pu R. Thangseia, President, MNF Champhai South Block chuan kaihruaiin Pu HS Vanlalfakzuala, President, MNF Champhai North Block-l, Executive Member, General Hqrs. ni bawk chuan Diamond Jubilee lungphun a khuh hawng a ni.
Pu Lalhmingmawia Pachuau, Executive Member, MNF General Hqrs. chuan kalkhawmte hmaah thu sawiin Martar-te chibai a buk a, MNF lo indin chhoh dan tarlangin kum 1962, April ni 2-ah General Conference hmasa ber neiin chutah chuan an in thlang leh a, Mizo hnam tan hun pawimawh ber kum 1966, March ni 1-ah Declaration of Independence neih ani ta a, hetah hian Pu Laldenga telin mi 60 in hming
an ziah hnan nghe nghe a ni, a ti.
A sawizelnaah Pu Lalhmingmawia Pachuau chuan hun alo kal zel a, kum 20 chuang rambuaiah Mizoram chu kan lo lut ta a, harsatna tam tak kan tawk chho a, kohhran hote leh tlawmngai pawlte hmangin Pathianin min kaihhruaina hnuaiah inremna kum 1986, June ni 30-ah neih alo ni ta
a ni, a ti a. MNF hian hun harsa tam tak lo tawk tawhin ramhnuai-ah ani emaw over ground politics-ah ani emaw Pathian hruai chhuahna kan lo dawng thin a, tunah pawh Covid-19 hripui lengin kan sorkar min nuai chho leh mahse Pathianin hun tha leh zawk min ре leh dawn ani tih i beisei tlat ang u, a ti bawk.
Pu Lalhmingmawia Pachuau chuan MNF kum 60 tlin champhaphak lawmna chu kumtluana hman tur anih thu sawiin vawiin a hun an hmanna chu a hawnna chauh anih thu a sawi a, kum 60 tling party kan lo ni tawh a, India rama party lian leh upa zing ami kan lo ni ve tawh a, remna leh muanna kan neih kum 1986, June ni 30 atanga chhiar pawhin
kum 35 kan lo tling chho ta a chuvangin kan politics khelh danah pawh tunlai khawvel hun inher social media chak em em tawhah hian fimkhur taka kalin rinawmna leh dikna hmachhuanin i kal zel ang tiin kal khawmte a sawm a ni.
He hunah hian Diamond Jubilee pualin party worker ten Dar Khuang vawi 60 an vaw bawk a ni.
Comments are closed.