MOTOR KE 12 TLAN PHALLO

Kumin Fur chhunga Champhai leh Aizawl inkara

lirthei kalten kawng lakah harsatna nasa tak an tawh chhoh avang leh lirthei dang tangkhang thin pumpelh a nih theihna tura.Champhai District SP Rex Zarzoliana Vanchhawng kaihhruaia lirthei tlan dan tur lo ruahman tawh, a tul anga ennawn leh tihdanglam tura tih chu nimin khan SP Pisa-ah thlirlet a ni a. Champhai leh Seling inkarah August ni 16 atanga September thla chhung atan Lirthei Ke 6 nei aia tam tlan rih lo tur leh, ni kar dana intlan chhawk kalpui mek chu hman chhunzawm tura tih a ni.

Nitin mamawh phurh velna leh khualzin veivakte bakah lirthei kal vel him zawkna tura Champhai leh Aizawl inkar, a bikin Champhai leh Saitual inkar kawngpui dungah ritphur lirthei kawng kam dai palh leh tangkhangte avanga khualzin lirthei dangten harsatna nasa tak an tawh mek chu sutkian anih beiseiin,. July 13 atang khan ritphur lirthei 407 Truck leh a chunglam zawngte chu Champhai leh Aizawl inkar-ah nitin intlan chhawk tura tih a ni.

Nimin thutkhawmah hian ruahmanna kalpui

mek chu thlirlet a niin, hlawhtling thawkhat a ngaih ni a. Mizoram PWD Highway Chief Engineer in Champhai leh Seling inkar National Highway No 6 nihphung leh he kawngpui a lirthei tlan phal chin

chungchanga a tarlan, Dan leh thupek kengkawhtuten keng kawh tura a tihna lehkha chu thlirho a ni. PWD Highway Chief Engineer lehkha-ah hian Seling leh Champhai inkar (NH No 6)chu Village Road Standard, Class 9 Specification a nih vanga ritphur lirthei lian Ke 6 nei aia tam zawh phal a nih loh dan te, Motor Vehicle Act 198 tlawhchhana a nih tur aia tam bungraw phur enfiah leh man theih a nih dan leh, Keifanga inbun Nidhi Infrastructure Survey ta, weigh bridge chu a thlawna hman theih a nih dante ziahlan a

ni a.

Lirthei leh mitin himtlan zawkna turin August

ni 16 atanga September thla chhung Champhai leh Seling inkarah ritphur lirthei Ke 6 nei (2 Axles) aia tam chu tlan rih lo tur leh tuna ruahmanna kalpui mek, ni kar dana lirthei intlanchhawk chu kaltlangpui rih tura tih a ni a. He ruahman thar hi lirthei neitute leh khalhtuten zawm hram tura ngen an niin, lirthei tlan dan enfiah turin Police te pawh duty tura tih an ni a. Khaw awmdan azirin he ruahmanna kalpui zel dan turah a tul anga enfiah leh tura tih a ni bawk. Tarlan tawh angin Champhai leh Seling inkarah chawhrualin nitin lirthei 1585 vel a tlan a, Saitual leh Champhai inkar kawngpuí National Highway No. 6 hi cheithat mek a niin, tuihawk luankawr haikhuar thar a nih vang leh lei a hmin leh nal vangin lirthei lianchi tan inpelh a harsa hle a. Saitual leh Champhai inkar kawngpuiah hian zankhat thilah ritphur lirthei kawngkam dai palh 10 chuangte a awm thin a. Khawih chetzui ngam loh a nih thin avangin khualzin lirthei dangte kaltlang thei lovin an tangkhang nasa thin hle.

Nimin thutkhawmah hian District Police hotu

te, Champhai SDO (Sadar), MJA, YMA Sub-

Hqrs Champhai, ZDU Sub-Hqrs Champhai,

Champhai Truck Owners’ Association (CTU) leh

Mizoram Truck Drivers’ Association Sub-Hqrs

Champhai aiawhte an tel a ni.