Myanmar atanga raltlan mi 4 te’n Champhai an rawn thleng.
Champhaia raltlan awm mekte hi mipa 3 leh hmeichhia 1 an ni a, mipa 2 leh hmeichhia pakhat hi Kalay Town atanga raltlan niin mipa 1 hi Tamu Town atanga raltlan a ni thung.
Heng raltlante hi February ni 28 leh March ni 1 a Champhai rawn thleng te niin, DPRC building, Champhaiah dah an ni a. Niminpiah khan DIET, Champhai Zotlanga sawn niin, dah lailawk rih an ni a, an awm zel dan tur hi la ngaihtuah leh tur a nih thu dawn a ni.
Myanmar raltlante dawnsawn dan tur chungchang hriattirna hi Champhai DC Maria CT Zuali chuan a lo chhuah tawh a. Home Department-in inkaihhruaina (SOP) a siamte tha taka zawm turin Champhai mipui a hriattir tawh bakah, Politics leh pawl thila inhnamhnawih avanga Myanmar sawrkar atanga harsatna tawk leh dinhmun hlauhawma dingte chauh raltlan anga chhiar tur an nih thu leh, humhimna pawh pek tur an ni ang tih Hriattirna chhuahah hian tarlan a ni a.
Raltlante hi mumal taka chhinchhiahin, DC in ID Card a siamsak vek dawn a, damlohna thilah CMO in certificate a pek hmanga DC in Movement permit a pekte chauh lo chu anmahni thua an awmna camp chhuahsan phalsak an ni lo bawk.
Comments are closed.