Myanmar tualchhung buaina avangin Champhai District chhungah raltlan an rawn luh belh zel a, Champhai district-ah hian raltlan 3000 chuang an awm tawh.
YMA Sub-Hqrs Champhai President F. Lalrinmuana sawi danin, Inrinni khan raltlan mi 40te’n Champhai an rawn thleng a, an zinga 20 te hi Zomi Welfare Committee Champhai enkawl Holy Cross School Building-ah dah an ni a; Zion Veng BM Primary School-ah mi 20 dah luh an ni bawk. Zomi Welfare Committee Champhai enkawl Holy Cross School Building-ah hian raltlan 110 an awm tling tawh a, Methodist Kohhran leh NGO For Myanmar-in mi 20 ve ve an enkawl mek bawk a. Heng bakah hian mahni chhungte bel eng emaw zat an awm bawk a. SYMA Champhai chhinchhiah danin Champhai khawpui chhungah raltlan hi 1347 an awm mek a.
SYMA Champhai chuan Zirtawpni khan raltlan te dah lailawkna sakna tur Rua pum 1000 leh Mutbu thahnem tak Tuipuiral Group YMA hnena an hlan a, Inrinni khan a hlawma raltlan enkawlna hmunah te pawisa fai Cheng 33,000 an sem chhuak bawk.
Inrinni khan Tuipuiral huam chhungah raltlan 25 an luh belh leh a, Satawm khua atanga rawn kal Tiau Luia tangkhang mi eng emaw zat te chu Inrinni khan hruai luh hman beisei a ni. Tuipuiral Group YMA Secretary Challianngura sawi dan chuan, Tuipuiral huam chhungah Myanmar atanga raltlan hi 2087 an awm mek a. Farkawn-ah tam berin 858 an awm a, Vaphaiah 337, Thekte-ah 212, Khawbungah 196, Zawlsei-ah 126, Khuangthing-ah 57, Khankawn-ah 52, Sesih-ah 42, Khuangleng-ah 45, Thekpui leh Sazep-ah 26 ve ve; Dungtlang-ah 25, Vanzau-ah 24, Vangchhia-ah 12, Zawngtetui-ah 10, Leithum-ah 9, Bungzung leh Leisenzo-ah mi 7 ve ve; Lianpui leh Samthangah mi 2 ve ve leh Chawngtuiah pakhat an awm a; raltlan hi an rawn luh belh zel a, a zat hi danglam leh thei a ni.
Champhai khawpui chhung leh Tuipuiral huam chhunga raltlan awm mekte hi SYMA leh Tuipuiral Group YMA chhinchhiah danin mi 3,434 an tling tawh a, anni bakah hian chhinchhiah tel loh, mahni chhungte bel mi eng emaw zat an awm rin a ni bawk.
Comments are closed.