Nimin khan MZP Headquarters Champhai hruaitute leh Govt. Champhai College Students’ Union hruaitute chuan, Champhai North bialtu MLA Dr. ZR Thiamsanga hovin Mizoram Youth Commission Chairman Dr. Vanlaltanpuia an hmu a. Champhai-ah MYC Coaching Center hawn a nih theih nan hma la turin an ngen.
MZP Headquarters Champhai thuchhuah tarlan danin, MZP chuan Champhai khawpuiah MYC Coaching center hawn a nih theih nan, nikum atang tawhin hma a la reng a. Mizo thalai te hna zawn kawnga inbuatsaih nana Mizoram sawrkarin MYC kaltlanga Aizawl, Lunglei, Siaha leh Kolasib-a Coaching Center hawn a tum chu Champhai khawpuiah pawh hawn a nih ngei theih nan hmalak chhunzawm a ni a. Champhai North Bialtu MLA Dr. ZR Thiamsanga hoin, MYC Chairman Dr. Vanlaltanpuia hnenah hmun dang ruala Offline Coaching Center Champhaiah hawng ngei turin ngenna an thlen nawn leh a ni.
MYC Chairman Dr. Vanlaltanpuia chuan, MZP Headquarters Champhai te duhna leh zirlaite hmakhua an ngaihna chu a hriatthiampui thu sawiin, Coaching Center hmunhma turte lo dap a, lo thlithlai turin thurawn a lo pe a. Remchang hmasa berah a hmunhma tur enfiah ngei a duh thu a sawi a. A rang thei ang bera bawhzui a, tihhlawhtlin ngei a tum thu a lo hrilh. MYC Chairman Dr. Vanlaltanpuia lo dawnsawn danah leh theihtawp chhuaha hma la a, a hlawhtlin ngei theih nana lo bawhzuitu Dr. ZR. Thiamsanga chungah MZP Headquarters Champhai chuan lawmawm a ti hle tih an tarlang bawk.
Comments are closed.