NAKIN HUN NGAIHTUAH CHUNGA HMALAK TUL TI

Get real time updates directly on you device, subscribe now.

Nimina Champhai Town Land Committee thukhawm chuan Champhai khawpui chhunga House Pass, Periodic Patta leh Land Lease dilna lut 199 zinga 187 an pawm.

Nimin khan Champhai Town Land Committee chu an Chairman James Lalrinchhana, District Collector hovin DC Conference Hall-ah an thukhawm a, hetah hian Champhai khawpui huam chhunga veng leh khua 17 atanga dilna lut hrang hrang 199; house pass dilna 197, periodic patta dilna 1 leh land lease dilna 1 chu zirchiana ngaihtuah a ni a. Land Revenue & Settlement Department zirchianna leh record neihte behchhana Champhai Town Land Committee-in ngun taka dilna lutte a ngaihtuah hnuah, dilna lut 199 atanga 187 te chu pawm a ni a, house pass dilna 1 hnawl niin, dilna dang 11 te chu enho leh ni se tiin rel a ni bawk.

District Collector James Lalrinchhana chuan house pass, periodic patta leh land lease dilna lut pawm thar ten document pawimawh tak an nei thei tur chu a lawmpui thu sawiin, dan ang takin sawrkara chhiah a lut thei tawh tur chu lawmawm a tih thu a sawi a.

Hun eng emawchen hnua Champhai Town Land Committee thutkhawm a ni leh thei ta chu lawmawm tiin, kum khatah vawi 2 aia tlem lo thutkhawm neih thin tum a ni, a ti a. Thutkhawm neih hmaa ngun taka VC leh khawtlang hruaituten zirchianna an lo nei lawk leh inpuahchahna tha tak an nei chu fakawm tiin, khawtlang aiawha roreltute an nih angin khawtlang tana tha ber tur thlir chung zela ngaihtuahna nasa zawk seng zui zel turin a chah a ni.

Bawrhsap James Lalrinchhana chuan khawpui thang zel leh nakin hun thlenga khawpui hmakhua ngaihtuah chunga hmalak a tul tih sawiin, awmze nei taka Champhai khawpui cheimawi, thuamthat leh hmasawnna kalpui kawngah hmathlir thui tak. neih a ngai a ni, a ti a. Land Committee chu ram humhalhna atana pawimawh tak, khawpui. ruangam din kawnga tangkai tak a nih avangin kum lo la kal zel tur thlir chungin dilna lutte ngun taka zirchian hmasak thin a ni, a ti bawk.

He hunah hian Vanlalchhuanliana, Settlement Officer & Member Secretary, Champhai Town Land Committee chuan, dilna lut hrang hrangte endik a nih dan a sawifiah a; Committee report a pe bawk. Nimin Champhai Town Land Committee thutkhawmah hian line department hotu te, VC, NGO leh political party aiawhte an tel a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More