National Highway No. 6 Melbuk leh Zokhawthar inkar kawng leimin leh box culvert chhia te vawiin thlengin siamthatna hnuhma hmuh tur ala awm lo.
Helai kawng hi July thla atanga min tan tawh niin Vawmkawlui a box culvert chu August ni 23 khan a chim bawk a, hemi chungchangah hian Champhai NGO Coordination Committee hruaitute leh kawng lai tu TARMAT Company te chu August ni 31 zan khan inkawmin TARMAT Company aiawh te hian kawng min leh box culvert te hi siamthat leh intiamin September ni 10 ral hmain
Geotech Engineer ten an enfiah dawn niin an sawi a.
NGO Coordination Committee hruaitute chuan vawiin thlengin Geotech Engineer te hi anla rawn kal lo niin an sawi a, NGO Coordination Committee hian TARMAT Company ten hmanrua anla lak chhuah loh te vawiin ni thlengin anla hren sak a ni.
NH-6 Melbuk leh Zokhawthar inkar hi September ni 17 khan PWD Engineer-in-Chief hovin tlawh leh a ni a, box culvert chhia cheithat ai chuan rotling zawk leh rinawm zawkin a dang siam leh dan ngaihtuah anih thu PWD Engineer-in-Chief hian a sawi a. Kawng cheithat anih chhunga lirthei
kal ten harsatna an tawh loh nan Melbuk leh Zokhawthar inkar PWD kawng, kawng hlui zawk chu cheithat anih tur thu a sawi bawk.
Hetihlai hian Melbuk VCP hian Melbuk leh Zokhawthar inkar kawng National Highway July thla atanga lirthei zawh theih tawh loh chu vawiin thleng in kutthlakna hnuhma
hmuh tur ala awm lo tih a sawi a. Zokhawthar VCP pawhin Zokhawthar leh Melbuk inkar kawng hlui cheithat ala nih loh thu leh Zokhawthar khawtlang sumin an cheitha zawk tih a sawi ve bawk.
Hetihlai hian National Highway No. 6 atanga
Mualkawi pan chhohna kawng chu Zirtawpni tlai khan lirthei kaltlang theih lovin leiminin a hnawh.
He lai kawng hi Tuipuiral tlangdung ten Highway an rawn pawhna kawng a ni a, NH-6 zawhin Mualkawi-ah lehluh theih nimahse
helai hi kawng pawimawh tak anih avangin Inrinni zing khan PWD lei laihna khawl hmangin leimin hi then hna thawh nghal a ni a, Inrinni chawhnu lam khan lirthei kaltlang
theihin siam lehnghal a ni.
Comments are closed.