Nimin khan Champhai District chhungah Covid 19 hri kai mi 76 hmuh chhuah belh leh a ni a. Hetihlai hian Champhaiah Covid-19 hridanna chu kar khat chhung an chawlh hnuah nimin khan pek chhunzawm leh a ni a; hridanna la chhunzawm duh lo mi 257 an awm.
Champhai District-ah nimin khan TrueNat hmangin hri kai 43 hmuhchhuah a ni a. Kelkangah 33, Kahrawtah 6 leh Electric vengah hri kai 4 hmuh belh a ni a. RAgT hmang in Venglaiah 7, Vengsang ah 5; North Khawbung, Bethel leh Tuipuiah 3 theuh; Tlangsam leh Dungtlangah 2 ve ve; New Champhai, Vengthlang, Dinthar, Kanan, Ruantlang, Electric Veng, Zote leh Zotlangah te hri kai pakhat theuh hmuh chhuah a ni bawk.
Heti hian Champhai District chhunga Covid 19 hri kai hmuh chhuah chu 5,369 an tling tawh a, an zinga 4,871 te enkawl dam tawh niin enkawl dam zat hi hri kai hmuh chhuah atanga chhutin za zela 90.72 a ni a; hri vei enkawl lai hi 487 an la awm mek.
Hetihlai hian Champhai Main Centre huam chhungah nimin khan Covid-19 hridanna hi kum 18 chunglam, naupai leh raltlante hnenah pek chhunzawm niin Champhai, Vapar, Melbuk leh North Khawbung-ah te vaccination drive hi neih a ni a. Tun dinhmunah kar khatah ni hnih zel Covid-19 hridanna lak hun hi hawn tum a ni.
Hemi chungchangah hian Champhai CMO Office-a vaccine pek chhuah viltute chuan, vaccine la tur an tam tawh loh avangin bial hrang hrangah a remchan dan angin vaccination drive chu neih thin a ni a; vaccine pek tur indaih lohna a awm lo tih an sawi a. Kum 12 atanga kum 17 inkarte hridanna pe turin survey an nei fel tawh a, Champhai District chu a inpeih tawh tih an sawi.
CMO Office-in a chhinchhiahnaah Covid-19 hridanna hi 72,481 hnenah dose 1-na pek a ni tawh a. Dose la kim tawh hi 55,399 an awm a. Dose 1-na la, la chhunzawm duh lo hi 257 an awm a; Vaccine la lo hi 5347 vel an awm bawk.
Comments are closed.