August ni 21, Pathianni zana Ngur khuaa mipa naupang kum 9 mi thihna thleng chungchanga mawhphurtua puh, Lalziding chu Zirtawpni zan khan man a ni.
Lalzidinga hi Champhai Police leh Ngur khawtlangin an zawn hnuah, Zirtawp zan khan Ngur ram chhung Bellei Mual-a ram riak mi pathum te’n an thlamah Lalzidinga hi an hmu a, khawtlang hruaitute punin Lalzidinga hi an man a, Champhai Police kutah an hlan a ni. Lalzidinga lakah hian Champhai Police Station-ah IPC Section 302-na tlawhchhanin thubuai ziah luh a ni a, Champhai District Court-a hruai a nih hnuin Lung Inah khung nghal a ni. Lalzidinga hian a nau fa, mipa naupang kum 9 mi thihna thleng chungchangah hian mipui thinrimin kut an thlak a hlauh avanga tlanbo ta niin a insawi.
Thu dawn danin August ni 21, Pathianni tlai khan Lalzidinga hian a nau fapa chu pawisa bo chungchang ah a dahna zawtin kut a thlak a, kut a thlakna avang hian Pathianni zan dar 11:45 khan mipa naupang hi a thi a.
Lalzidinga hi tlan bo zuiin Zirtawp zan khan man a ni ta a ni.
Comments are closed.