Champhai District Hospital-ah a tlem berah Staff Nurse 47 vel awm tur an nih laiin tun dinhmunah Nurse ni 30 an awm mek a, Group D 47 vel awm turah 21 chiah an awm bawk a, hetianga thawktu indaih lohna a nasat avang hian ICU, Dialysis leh Cabin te chu kalpui hleihtheih a ni lo.
District Hospital, Champhaia thawktu indaih lohna chungchang hi nimin khan NGO CC Champhai chuan a hmunah kalin an zirchiang a, District Hospital-a thawktu indaih lohna hi vawi tam tak sorkarah thlen a nih tawh thu sawiin thawktu indaih lohna sukiang tura thawktu dah belh ngei turin Mizoram sorkar an phut a, hei bakah hian Nikum October ni 12-a Champhai District Hospital phurh thlen tawh RTPCR khawl hman theiha la peih fel loh le, a bun lai lawkna tura ruahman Eye ward pawh la chei that zawh loh a nih chu hriatthiam har an tih thu sawiin Sorkarin K Deposit-a sum a dah reng avanga tihpuitlin theih loh nia an ngaih thu sawiin a rang thei ang bera sum release turin Mizoram sorkar an ngen bawk a ni.
NGO CC hruaitute hian nimin vek khan 74 Road Construction Company hotute kawmin Champhai District chhunga BRTF enkawl New Champhai leh Vaikhawtlang inkar kawng chhe lutuk chungchang an sawipui a, 74 Road Construction Company hotute chuan fur ruahtui tlak hmain he lai kawng hi siam tha turin hna ruahman fel tawh a nih thu an lo sawi bakah Pioner road reserved nekchepa insa te leh leivung dahte chu dan anga hmalak ngai lo turina chingfel NGO hruaitute kaltlangin mipuite an ngen bawk a ni.
Comments are closed.