NGO-IN RELIANCE JIO INFOCOMM, CHAMPHAI KO KAL ZO LO

Nimin khan NGO CC chuan Champhai District-a Mobile service network thalo engtia siamthat tur nge ni ang tih sawihona MJA Press Club-ah a buatsaih.
He hun hi Zirmawia Ralte, Sr. Vice Chairman, NGO CC chuan kaihruaiin, he hun buatsaih a nih chhan tlangpui a tarlang a, network service provider te demna lam ni lovin, an harsatna tawh te sutkian a nih theihna tura he hun hi buatsaih a nih thu a sawi. He huna tel tur hian BSNL, AIRTEL, JIO leh Vodafone aiawhte sawm ni mah se, BSNL leh AIRTEL aiawhte chiah an kal a. BSNL leh AIRTEL aiawha kal te hnen atangin network tha zawk pechhuak tura hma an lakna leh harsatna an tawh mek ngaihthlak a ni a. BSNL hian lei lamah nasa takin hma an lo lak tawh thu leh UG Cable chah ngun em avanga lei lamah hma an lak theih tawh loh thu an sawi a. Microwave rin chhoh ngar ngar niin, Mini-link system hmanga network pek a ni tih tarlan a ni bawk. Central in BSNL hi 4G ala pe theilo a, Parliament in pass tawh mah se a hmanrua leh bungrua te India siam ngei hman tur a nih avangin buaina an la tawk a. An hmanrua leh bungraw mamawh te pek an la ni thei lo chu an buaina lian tak a nih thu ngaihthlak a ni bawk. BSNL chuan Tower 8 bun tura hma a lak mek thu leh Khawzawl nen signal awm lohna khua thlenga pek dan kawng dap mek a nih dan te tarlan a ni a. Tunah hian OPGW Khawzawl thleng approved tawh niin, 132 KV Line nen kalkawp tura ruahman a ni a, hei hi kalpui theih a nih chuan Jio leh Voda te pawh nung leh tura ngaih a ni tih tarlan a ni bawk.
Airtel hian network lakna kawng 2 neiin, kawng laih vangin hrui a chat ngun hle a, hei hian harsatna lian tak a thlen thu leh tunah hian Churachandpur atanga line thar lo kal a, Ngopa a lut turin hmalak mek a ni tih tarlan a ni a. Hei hi a hlawhtling thei a nih chuan harsatna tam tak an tawh te chu chinfel theih beisei a ni.
Airtel hi hmangtu tam vangin speed a chaklo a, pekchhuah theih zat tih tam a, signal tha zawk pek tum a nih mek laiin Tower bunna turah harsatna an tawk thin chu an harsatna lian tak a nih thu an sawi a. Khaw thenkhat Signal awm lohnaah Tower bun ve tura ngenna an dawn thin thu pawh tarlan niin, Company an nih avangin revenue a ngai a, criteria tlin lohna ah dah remlohna a awm thin a. A kawng erawh dap zel a nih thu te, Manipur atanga Line an pawh luh hunah chuan Ngopa tlangdung leh Sialkal tlangdung lam tan pawh zia awm phah ngei tura ngaih a ni tih te an sawi bawk.
He hunah hian District NGO hrang hrang Mizoram Upa Pawl, Maxicab Service Assn., Champhai Thalai Pawl, Champhai Nature Conservancy, MJA aiawh bakah mimal thahnemngai te an kalkhawm a. Kalkhawm chuan Mobile Service Network tha tak nei tur chuan, Tower bunna tura harsatna lo siam loh te, khawtlang hruaitute pawhin Company hmalakna tichak tura District Development Committee bakah MLA leh MP lamah nawr ve a tul tih te an sawiho a ni.

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More