Nimin khan Pu B.Lalzarzova, DHO Champhai, Pu K.Zonunsanga ADHO leh Department Staff te chuan Ngur khaw ram Phulkang hmuna thei leh thlai chinna hmunte tlawhin, hmalak theihna tur hrang hrangte an enfiah. Pu Lalsawmliana Serthum huan tlawhin Department hmalaknate a hmunah kalin an enfiah nghal a ni. DHO leh a thawhpuite hian Serthlum enkawl dan hrang hrangte a hmuna kala enfiahin zirtirna an pe nghal bawk a. Grape chinna hmun hmate enfiah bawkin, thurawn tulte an pe bawk a.
Ngur rama thlai chingtute tan hmathlir thui tak kawhhmuhin, thlai dangte pawh tha taka thar chhuah a nih an beisei thu leh Ngur ram leilung mil ang zela thlai chin kawnga pawimawhte hrilhhriatna hun an nei bawk a. Ngur khaw mipuite ei leh bara an intodelh theihna tura an ram leilung thatnate tangkai taka hmang turin duhsakna an hlan a ni.
Tun dinhmunah hian Ngur khuaah Grape, Serthlum leh Sapthei chingtu in 86 an awm mek a, Grape leh Serthlum bikah hian hlawkna an tel chho mek a ni. Ngur VC chuan an thei leh thlai chinna hmunhmate a hmun ngeia tlawha zirtirna petu DHO Champhai leh a thawhpuite chungah lawmthu an sawi a ni.
Comments are closed.