Ni 2 chhungin Ngur khuaah hri kai mi 92 hmuh chhuah an ni a, Biak In leh Zirna inte khar leh rih a ni.
Zirtawpni khan Ngur khuaah Rapid Antigen Test hmanga Sample endik 99 zingah hri kai mi 42 hmuh chhuah an ni a. Inrinni khan Sample endik chhunzawm leh niin, Sample endik 297 endik zingah hri kai mi 50 hmuh chhuah belh leh a ni a. Hri kai hmuh chhuah an pun tak avang hian 4C hmun 3-ah ruahman nghal niin, Govt Primary School leh Middle School bakah Wesleyan Methodist Kohhran Hall-ah te hri kaite hi dah luh nghal an ni.
Hetihlai hian Inrinni khan RAgT hmangin Electric Vengah mi 6, Venglaiah mi 4, Vengsang leh Zion Vengah mi 3 ve ve leh New Champhai, Bethel, Kanan leh Sesih-ah hri kai pakhat theuh hmuh chhuah a ni bawk. Champhai District chhungah hri kai hmuh chhuah chu 2,684 an tling tawh a. Inrinni khan Mizoramah hri kai hi 1478 hmuh-chhuah a ni a, Mizorama ni khata hri kai hmuhchhuah tam lama 3-na a ni. Inrinni khan Mizoramah sample 8229 endik atangin hri kai hi zaa 17.96 hmuhchhuah a ni a. Hri kai zingah hian natna lang chhuak 711 leh natlna lang chhuak lo 697 an awm a ni.
Comments are closed.