Ngur khuaah tualthahna a thleng.

Ni 25.1.2021 (Thawhtanni) zan dar 8 rik hma deuh khan Sangdeihmunga, kum 32 s/o Liandokhena, Ngur Vengsang-a cheng chuan Nengkhankhupa, kum 36, s/o Nginsiantingi, Ngur Vengsang veka khawsa chu kut thlakin, a bekah a vua a. Pu Nengkhankhupa hi a hliam tuar loin a boral zui nghal a ni. Chanchin hriat a nih veleh Champhai Police-te chu tualthahna thlenna hmunah hian thleng zui vatin; tualthattu hi thu zawt chiang turin Police Station-ah lak nghal a ni. Pu Nengkhankhupa ruang hi Thawhtanni zan khan Ngur khuaah lumen niin, nimin khan Postmortem a ni a; Postmortem zawh hnu hian a ruang hi a unaute chenna hmun Vapar vui tura panpui a ni.
Thudawnna in a sawi danin – Tualthattu, Sangdeihmunga-te nupa hi an inti thiam lo a; an thawm lo hretu leh boral ta – an thenawm Pu Nengkhankhupa chuan thelh tumin an in lam hi a pan a; tualthattu Sangdeihmunga nen hian inti thiam lo zuiin, Sangdeihmunga hian Pu Nengkhankhupa hi kut thlakin, a bekah na takin a vua a, tichuan a hliam tuarloin zan dar 8 rik hma deuhin a boral zui nghal a ni.