Ni 10.9.2020 (Ningani)

Get real time updates directly on you device, subscribe now.

π—˜π—Ÿπ—˜π—–π—§π—₯π—œπ—– π—©π—˜π—‘π—š 𝗔𝗛 𝗕𝗔𝗭𝗔π—₯ 𝗧𝗛𝗔π—₯ π—¦π—œπ—”π—  :
District Bawrhsap-in thupek a lo chhuah bawhzuiin DK Traffic point kiang kawng sira inpho te, C. Thangviaia dawr kawta Arsa leh Chawhmeh zawrh leh C.Denga Complex, Bazar chu tihtawp a ni a.
Upa JH Haudinga, Electric vengte chuan khawtlang hruaitute hma laknain an in sak lai chungah an veng mi, heng inzawrh phal tawh lohna hmuna thu thinte inzawrhna tur
Bazar an siamsak a. Bazaar hi mi 22-in luah nghalin, thlai zuar mi 19 leh arsa leh sangha zuar mi pathumte an ni a. He Bazar hi veng chhung mite tan chauha tih niin, bazar-a thute hian thut man an chawi thung dawn a.
Upa JH Haudinga-te chhungkua hian Bazaar-a thute inphona tur dawhkan leh mamawhte chu an siam sak vek thung a ni.
π—§π—›π—œπ—‘π—š π—§π—œπ—”π—ž π—¦π—˜π—  𝗖𝗛𝗛𝗨𝗔𝗛 𝗭𝗔𝗧 :
Environment, Forest & Climate Change Dept Champhai chuan Kumin June thla thleng khan thing tiak 8669 an sem chhuak tawh.
EFCC Dept Champhai atanga thu dawn danin Kumin January thla atanga June thla thleng khan Thing tiak 8669 an sem chhuak tawh a. Champhai Range-ah thingtiak hi sem chhuah hnem ber niin 3088 sem chhuah a ni a, Kawlkulh Range-ah sem chhuah tlem ber niin 130 sem chhuah a ni bawk. Khawhai Range-ah 1357, Hnahlan-ah 380, Khawzawl-ah 1575, Farkawnah 1120, Khawbungah 215 leh Ngopa Range-ah 804 sem chhuah a ni a. Undivided Champhai District chhungah Farkawn Rage-in thing tiak phun hnem berin 400 an phun a, Champhai Range-in 240, Kawlkulh – 26, Khawhai – 265, Hnahlan – 150, Khawzawl – 50, Khawbung – 50 leh Ngopa Range-in 45 an phun a. Champhai District chhunga Range hrang hrangte thingphun zat hi 1226 a ni.
π—Ÿπ—’π—‘π—˜π—œπ—§π—¨π—§π—˜ π—§π—”π—‘π—£π—¨π—œ 𝗧𝗨π—₯π—œπ—‘ π——π—˜π—£π—§ π—–π—›π—˜π—–π—›π—›π—¨π—”π—ž :
Champhai District chhunga loneitute harsatna tawh mek a hmuna enfiah a, hmalak zui dan tur leh loneitute tanpui turin nimin khan Champhai DAO Office-a thawktute an fehchhuak.Β 
Ni 8.9 2020 khan Khawbung ram, Tuiaw zau a buh chingte enfiahin V.Lalhriatpuii, Agriculture Extension Officer, Champhai a fehchhuak a.
Loneitute’n an hnena an harsatna thlen bawhzuiin George Lalthanngura, DAO, Champhai chuan Champhai atangin V.Lalhriatpuii, AEO hi tir nghalin a hmunah an va en nghal a. Tuiaw zau ah hian leilet siam chhungkaw 21 awmin chhungkaw 7 te leilet chu buh natna β€˜Stem rot’ in a bei tih hmuh a ni. Stem rot natna hian buh hmun tui hnuaiah buh kung ti tawihin buh hnah te a lo ti eng a, Buh in a chhiat phah thin a ni. Heng buh natna enkawl tur hian Fungicide β€˜SAAF’ pek nghal niin AEO Hriati hian a hman dan tur leh tul dangte a zirtir nghal a ni. Loneitute hi NPK foliar Spray pek nghal an ni bawk.
AEO Hriati hian niminah Saikhumphai, Vaphai a National Food Security Mission hnuaia buh chin tir hrang hrang leh Vaimim chin te a hmunah a en nghal ang.
Thawhlehni vek khan FOCUS hnuaia Farmers Interest Group, Mualkawi a mite Sawhthing chin enfiahin Technical Officer te an kal bawk a. Mualkawi rama Sawntlung lui zau ah hian chhungkaw 72 in sawhthing chingin, chhungkaw 30 in harsatna an tawk mek a ni. FOCUS Officer te hian a hmuna an enfiah hnuah sawhthing chu thlai natna β€˜Ginger Soft rot’ in a beih bakah rannung β€˜Rhizome fly’ in a beih tel tih an sawi a.
Sawhthing chingtute hi tul pawimawh hrang hrang hrilh nghal niin an mamawh ang rannung thahna hlo pek an ni ang tih Champhai DAO George Lalthanngura chuan a sawi bawk.
π—§π—›π—¨π—£π—˜π—ž 𝗖𝗛𝗛𝗨𝗔𝗛 :
Champhai SP ,Rex Zarzoliana chuan thupek chhuahin,nimin atanga Inrinni thleng hian zinglam dar 6 atanga tlailam dar 5 thleng Kelkang leh Dilkawn inkar kawng chu laih zauh hna thawhani dawn a. Hei vang hian Khawbung kawng zawh turte chu zinglam dar 8 atanga chawhma dar 10 thleng kal phal sak an ni ang a, chawhnu dar 2 atanga tlailam dar 4 thlengin kal phalsak a ni ang tih a tarlang.
π—§π—›π—¨π—•π—¨π—”π—œ π—­π—œπ—”π—ž π—Ÿπ—¨π—§ :
August thla khan Excise & Narcotics Department Champhai chuan thubuai 18 an ziaklut. August thla khan MLP Act hnuaiah tualchhung siam chhuah
rakzu ltr.100.55 man a ni a, zu siamna buhfai tin 94 man ani bawk. Ram dang atanga lakluh zu um 44 leh beer can 1868 man ani a, Zu bilhna hmanrua 25 man ani bawk. MLP Act hnuaiah hian case pakhat ziahluh a ni a, mihring man an awm lo thung. ND&PS Act hnuaiah Methamphetamine mum sing 1 man
a nia, case 17 ziahluh niin mihring pahnih man an ni bawk.
π—­π—œπ—”π—Ÿ π—‘π—¨π—”π—œ 30 π—–π—›π—¨π—”π—‘π—š 𝗠𝗔𝗑 π—£π—’π—Ÿπ—œπ—–π—˜ π—§π—˜π—‘ 𝗠𝗔𝗑 :
Nizan hmasa khan Champhai Police te chuan dan lova phurh luh Sikret Case 300 an man.
Champhai Police Station atanga thu dawn danin nizan hmasa dar 11:30 khan Champhai Zotlang daiah Lirthei 3 atangin Myanmar Sikret, dan lova phurh luh an man a. Heng Sikret-te hi Myanmar atangin Melbuk kal tlanga phurh luh a ni a. Sikret-te hi Jamal Uddin Kum 30, Abdul Kafur fapa Karimganj; Nasrul Hoque kum 23,
Abdul Rahman fapa Karimganj leh
Lalrammawia kum 31 s/o Thasiama
Sailo (fam) Champhai Kanan veng ta niin, tualchhung hralhnaa chhutin Rs. Nuai 36 man vel a nia. Sikret phur luttute leh a neitute hi Champhai Police Station-ah thubuai siamsak anni.
π—žπ—›π—¨π—‘π—š 𝗛π—₯𝗔𝗑 𝗭𝗔𝗧 :
Champhai District-ah mi 28 khung hran mek anni.
DPRC Institutional Quarantine Centre ah mi 20, mipa 18 leh hmeichhia 2 te khung hran mek an nia, mahni ina inkhung hrang mipa pasarih an awm mek a, DCHC, Nursing School Building ah mipa pakhat enkawl mek a ni bawk. Champhai District chhunga khung hran mek te hi mipa 26 leh hmeichhia 2 te an ni. Khawzawl District Quarantine Facilities ah mi 10 khung hran mek an la ni a. DC Rest House, Khawzawl Darngawn vengah mipa 5; PWD IB, Dinthar Vengah mipa 1 khung hran niin, Forest Rest House, Hermon Vengah hmeichhia 4 khung hran mek an ni bawk. Khawzawl District a khung hran mek te hi mipa 6 leh hmeichhia 4 anni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More