Ni 12.9.2020 (Inrinni)

Get real time updates directly on you device, subscribe now.

π—šπ—₯π—”π—£π—˜ π—›π— π—”π—‘π—šπ—œπ—‘ π—₯𝗦. π—‘π—¨π—”π—œ 6 π—–π—›π—¨π—”π—‘π—š π—Ÿπ—˜π—œπ—–π—›π—›π—¨π—”π—ž :
Champhai Grape Growers’ Society chuan Champhai leh a chhehvela Grape chingtute Grape thar chhuah Kg 1,14,021.51 an leisak.
Champhai Grape Growers Society hian Tlangsam Winery-a dah turin July ni 17, 2020 atanga khan Champhai leh a chheh vela Grape chhingtute thar chhuah hi leisak tanin, Kg 1 Cheng 50 zelin Kg 1,14,021.51 an leisak a. Grape leina atan Champhai Grape Growers’ Society hian Rs. 57,01,148.00 seng ralin Ningani khan Grape hralhtute account-ah an thun felsak nghal vek a ni.
Champhai Grape Growers’ Society te
chhinchhiah danin HS Vanlalfakzuala, Champhai Vengthlang chu Grape hralh hnem ber niin Kg 13,786.48 a hralh a. C. Zohmingliana, Champhai Vengsang in Kg 9,942.4 a hralh bawk a. R.Vanlalhruaia, Champhai Vengsang chuan Kg 7493.25 a hralh a, Lianthuama, Ngur in Kg 5631.55 hralhin, C.Thankhuma, Champhai Zotlangin Kg 5437.05 a hralh bawk.
𝗩𝗔π—ͺπ—ž 𝗖𝗒π—₯𝗒𝗑𝗔 π—©π—œπ—₯𝗨𝗦 π—©π—˜π—‘ 𝗗𝗔𝗑 π—˜π—‘π—™π—œπ—”π—› :
Champhai District Magistrate Maria CT Zuali chuan nimin khan India leh Myanmar ramri, Saikhumphai tlawhin, African Swine Fever (ASF) ven kawnga hmalaknate a enfiah a. Thupek bawhzuiin Indo-Myanmar ramri kana ran intlatpawlhtir a awm tawh lo.
Champhai District chhung khaw pahnih Samthang leh Farkawnah nimin khan khualzinte hipna tur Eco-tourism chawilar leh chhiatrupna thlen thulha chetlak leh tih tur tulte inzirtir a ni a. Vanramchhuangi, Chairman, Pi Fangi Tourism Development Agency (PF-TDA) leh K. Lalmuanpuii, Lenbuang Handloom & Handicrafts te’n Eco-tourism chawilarna kawnga zirtirna an pe a. Chhiatrupna thlen thulha chetlak dan tur leh Village Level Disaster Committee (VDMC) te mawhphurhna chungchang PC Zoramthara, District Disaster Management Coordinator in a zirtir bawk.
He zirhona hunah hian Champhai District chu Eco-tourism lama theihna sang tak nei a nih thu leh, eizawnna kawnga innghahna tham a ni tih tarlan a ni a. District chhung khua Village Level Disaster Committee (VDMC) din lohnaah te pawh VDMC mumal leh nung tak din vek tuma hmalak mek zel a ni tih tarlan a ni bawk. Relief Camp siamte lirnghing mai bakah khuarel chhiatna thlen thulha sahimna tura siam a nih thu leh tuichhe paihna leh tuiluankawr mumal tak siam a tul thute inzirtir a ni bawk.
Pi Fangi Tourism Development Agency (PF-TDA) leh NEC tangkawp hmalaknain Mizorama khaw 5; N.Vanlaiphai, Farkawn, Khawbung, Samthang, Kelkang leh Tlangnuam/Chhuantharahte Tourism chawilarna kawnga hmalak tum a ni a. Heng khuate hi pipu sulhnu, rinna leh sakhuana lam, ramngaw leh nungcha awm that vang a thlan an ni a. Heng khuaahte hian Khualzinte hip a, an hnen atanga sum leh pai lakluh, tunlai khawvel nunphung leh ningkhawng hriat mai bakah Tourism tihhmasawn kawngah thui taka hmalak tum a ni.Β 
Maria CT Zuali hian nimin chawhnu khan India leh Myanmar ramri Saikhumphai chu tlawhin, thenawm State leh ram thenawma leng mek African Swine Fever ven kawnga hmalaknate a enfiah a. Thupek bawhzuiin Indo-Myanmar ramri kana ran intlatpawlhtir a awm tawhlo tih finfiah a ni.
𝗠π—₯𝗣 π—”π—œπ—” 𝗧𝗒 𝗔 𝗭𝗨𝗔π—₯ π—§π—˜ π—˜π—‘π—™π—œπ—”π—› :
Champhai khaw chhunga Motor part zuar, MRP aia to-a zuarte man an ni.
Tunkar Thawhtanni atanga Ningani thleng khan Legal Metrology Enforcement Staff leh Consumer Union-te chuan Champhai khawpui chhunga Motor Part zuar dawr hrang hrangte an enfiah a; dawr 17 atangin an bungrua, a MRP thai chhiat leh a MRP aia to-a hralh man chhuah a ni a. Hei hi Legal Metrology (Package Commodities) Rules 2011 bawhchhiatna a nih avangin an dawr bungruate hi mansak an nih bakah, dawr neitute hi Legal Metrology Office ah koh an ni a, dan angin an chungah hremna lek a ni bawk.
Legal Metrology Dept. leh Consumer Union-te hian en dikna an neih hma hian dawrkaite hnenah an bungruate MRP aia to-a hralh lo tura hriattirna an lo pe tawh a. Mipui te pawh thil an lei dawn apianga MRP en nachang hre tur leh, a theih chin china Cash Memo dil zel turin an chah a. Sumdawng dan bawhchhia an awm chuan Legal Metrology Office, Champhai Vengsang-ah Report zel turin mipui an chah a, Consumer-te dikna chanvo humhalh chungchangah theihtawp an chhuah zel tur thu Legal Metrology lam leh Consumer Union hruaitute hian an sawi bawk a ni.
π—§π—›π—¨π—£π—˜π—ž 𝗖𝗛𝗛𝗨𝗔𝗛 :
District Bawrhsap, Maria CT Zuali chuan luia cheng chi nungchate humhalhna thupek a chhuah. Thupeka tarlan dan chuan Champhai District chhunga lui leh lui teah-te Nghafuan ven khap tlat a ni a. Sangha, Chakai leh luia cheng chi nungcha dang reng reng – tur, bomb, dynamo leh Chinai hmang te-a man khap tlat a ni a. He thupek hian chhuah a nih atanga thla hnih chhung a huam ang.
π—šπ—”π—¦ π—₯𝗔π—ͺ𝗑 π—§π—›π—Ÿπ—˜π—‘ 𝗗𝗔𝗑 :
August thla khan Mizofed LPG Office, Champhai-ah Gas trip 10 phurh thlen a ni.
August thla a Gas rawn phurh thlen te hi thla dang nen khaikhin chuan phurh thlen tlem pawl a ni a, Gas bur lian chi bur 36 leh bur pangngai 3042 rawn phurh thlen a ni a. Gas rawn phurh thlen te hi Point hrang hrangah semchhuah nghal zel a ni. Tunah hian Gas bur stock a tlem avangin Gas mamawh avanga Mizofed LPG Office pantute hnenah pawh pekchhuah theih a ni tawh lo va, permit nei te erawhchu pek an ni thung.
π—žπ—›π—¨π—‘π—š 𝗛π—₯𝗔𝗑 𝗭𝗔𝗧 :
Champhai District Quarantine Facilities ah khung hran mi 38 an la awm mek.
DPRC Institutional Quarantine Centre ah mi 26, mipa 20 leh hmeichhia 6 te khung hran mek an ni a, mahni ina inkhung hrang mipa pasarih awm mekin, Tourist Lodge Institutional Quarantine Centre-ah mi 3, mipa 1 leh hmeichhe 2 khung hran mek an awm bawk a. Dedicated Covid Health Centre, Nursing School Building-ah mipa 2 enkawl mek a ni a. Champhai District chhunga khunghran mek te hi mipa 30 leh hmeichhia 8 an ni.
Khawzawl District Quarantine Facilities ah mi 9 khunghran mek an la ni a. DC Rest House-ah mipa hlang pasarih khung hran an ni a, Forest Rest House-ah hmeichhia pahnih khung hran mek niin, Khawzawl District a khunghran mek hi mipa 7 leh hmeichhia 2 an ni.
𝗗𝗔𝗑 𝗕𝗔π—ͺπ—›π—–π—›π—›π—œπ—” :
Ningani khan Champhai district-ah inkharkhipna dan bawhchhia, hmai tuam lo mi 13 man an ni a, an pawisa chawi hi Rs. 1300 a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More