Zokhawthar border trade tangkai zawka hman duh :
MJA Champhai District chuan Sorkarin Manipur, Tripura leh Bangladesh lama kawng a dap karah Zokhawthar border trade chu tangkai zawka hman dan tur dap tula an hriat thu an sawi.
Nimin khan MJA Champhai District Vice President Lalhlupuia kaihhruaiin General Body Meeting neih a ni a. He hunah hian District MJA President chuan Hrileng avanga harsatna thleng karah MJA te chu khaihlak lutuk awm lova hna an thawk chhunzawm thei chu lawmawm a tih thu a sawi bawk. Ramri kiang buaina vanga nitin mamawha harsatna thlengah, Mizoram sorkarin Manipur, Tripura leh Bangladesh lama kawng a dap karah Zokhawthar border trade chu
tangkai zawka hmang a, bungraw thiar man a tlawm zawk theihna tur lam te dap a tula a hriat thu sawiin, chumi lama bengchhi turin chuan MJA member-te chu a rawn a. Pawl hmalakna leh hmachhawp hrang hrangte a tarlang bawk.
Nimina MJA thukhawm hian resolution siamin, hripui leng vangin MJA General Conference neih theih a ni lo va, hei vang hian hruaitu thlan
theih a ni lo va, Executive Committee-in hruaitu tanglai te term a pawhsei chu MJA Champhai District chuan an pawmpuiin lawmawm an ti tih an tarlang a. Hei bakah hian an pawl hmalakna tur hmachhawp hrang hrang bawhzui dan turte an rel nghal a. Faina Hapta puala office fai endikna kal mek report pawh ngaihthlak niin a thawh hnihna atan pisa fai endik zui leh dan tur leh a hun tur an rel bawk.
MJA General Body Meeting
December ni 15 thleng tawh hun pe :
Champhai District Magistrate, Maria CT Zuali chuan nimin khan thupek chhuahin, Phaizawl leilet hmuna In leh Kudam sate chu Dec. ni 15 hmaa thiat turin a hriattir.
District Magistrate thupek a tarlan dan chuan, Sawrkar-in Champhai khawpuia In sak theihna a puan huam chhungah Phaizawl leilet hmun chu a tel loh thu leh Phaizawl chu buh chinna atana humhalh tlat a ni tih a tarlang a.
Champhai khawpui huam chhungah sawrkarin a puan ni loa chenna In tur leh Kudam leh a dang sak chu phal a nih loh bakah Mizoram Revenue Dan (The Mizoram Revenue Law, 10(6) leh
11(1) in a sawi leh tarlan, Agriculture LSC, Periodic Patta leh Garden Pass te chu a nihna ang taka huan thlai ilo siamna atan bak hman khap tlat a ni a. Phaizawla In leh Kudam leh a dang sate chu December ni 15 hmaa thiat vek turin a hriattir nghal a. Thupek zawm lote chu Section 19, The Mizoram Land Revenue Act, 2013 in a sawi leh he Dan in thuneihna a pek angin hmalak a ni ang tih a tarlang bawk.
Hrikai mi 31 dam takin chhuak :
Nimin khan Champhai-a Covid-19 hri kai enkawl lai mi 31 ten dam takin enkawlna hmun an chhuahsan.
Nimina hri kai enkawl damte hi hnamdang, Tarmat Company hnuaia thawk mi 30 leh hnamdang tho 1 niin, an vai hian mipa vek an ni a. Heti hian tun dinhmunah hri kai enkawl lai mi 7 an la awm mek a. Hri kai enkawl dam hi mi 57 awm tawhin, hri kai tawh zawng zawng hi mi 64 an awm tawh a ni.
Hetihlai hian Champhai District-ah mi 38 khung hran lai an awm mek a. Khung hran mek zinga mi 28-te hi Sawrkar inkhunghranna hmuna awm an ni a; in lama inkhung hrang hi mipa 3 an awm bawk.
Nimin khan District Hospital, Champhai-a TrueNAT khawl hmangin sample 7 enfiah niin, RAgT hmangin mi 40 hri an kai leh kai loh enfiah leh an ni bawk a, an vaiin hri an kai lo vek niin thu dawn a ni.
Kawlphetha siam chhuah ta :
Tlawva Small Hydel Project atanga kawlphetha siam chhuah chu kawlphetha dang nen hlawhtling taka chhun fin niin, Khawbung Electric Sub-Station atanga sem chhuah a ni.
Tlawva Small Hydel Project chu tunkar khan NORTECH Power Project Private Ltd, Kolkatta atanga mithiam lo kalte’n an enfel hnuah, kawlphetha an siam chhuah chu phai atanga kawlphetha lokal nen hlawhtling taka chhunfin niin, Khawbung Electric Sub-Station atanga sem chhuah a ni a. Tunlai hian tui a tlem tawh avangin kawlphetha siamchhuah theih zat chu Kilo watt 600 a ni a. Hei hi Khawbung Sub Station atanga eng pekchhuah Zaa 80 vel a ni a, tui tam lai chuan Kw 5000 a siamchhuak thei dawn a, Champhai District tan chuan
chenfakawm tak a ni dawn niin thawktute chuan an sawi.
Tlawva Small Hydel Project hian mumal taka hna a thawh theih hunah Mizoram sawrkarah an hlan chauh dawn niin Mizoram sorkar atanga he Project hnathawh viltu Sr Executive Engineer R.Lalrinkima chuan a sawi a. Tui a tlem tawh avang leh Company hnathawk te Puja hmanga an haw dawn avangin kawlphetha pekchhuah hi chawlhsan rih a ni ang.
Road Protection Squad-in khawpui chhung an enfiah zel :
Nimin chawhnu khan Road Protection Squad Committee Champhai chu Chairman Lalnunfela Chawngthu, Sub-Divisional Magistrate hovin an thawkchhuak leh a, Champhai Vengthlang huam chhunga IB Veng leh New Saron venga kawngpui nekchep zawnga hmala an enfiah a, dan palzutte chu insenghawi turin an hriattir.
He Committee hian Lirthei chhia/hlui – LPK 1, Sumo 3, Van 1, 207 pakhat leh Auto Rickshaw 1, a vaiin Lirthei 7 an senghawi tawh a. Vantlang tana hnawk leh kawngpui dal zawnga hma late hnenah a rang lama seng hawi tura hriattirna pein a tul angin hma a la thin a ni.
Dan bawhchhia man :
Champhai a Covid-19 No Tolerance Fortnight kalpui mekah nimin khan dan bawhchhia mi 2 an man a, Covid-19 Executive duty leh Champhai Police Station lamin man an nei lo thung. Heti hian Champhai
ah Covid-19 No Tolerance Fortnight dan bawhchhia hi mi 522 man an ni tawh a, an pawisa chawi hi a vaiin Cheng 68,500 a ni.
Sangha khawi duh tan :
District Fisheries Development Office (DFDO), Champhai chuan Pradhan Mantri Matsya Sampada Yojana (PMMSY) Scheme hnuaiah kum 2020-2021 atan Sangha khawina hrang hrang – Dil thar, Nursery Dil, Buh leh Sangha khawi pawlhna, Hatchery leh Ornamental Rearing Unit atante dilna a hawng thar leh a. A dil duh chuan tun thla ni 30 ral hmain DFDO Office, Champhai Kahrawt-ah Office hun chhungin dilna Form hmanga dil theih a ni.
Buh an sengsak :
Ningani khan Farkawn Theirekawn Veng YMA Branch te chuan damlohna avanga buhseng thei lo buh an sengsak.
Tunlai hian thingtlang lamah loneitute buhlu chuhin an tul hle a, buh hmin that tawh hnua ni khat leka khawtlai chuan buh a ngui hman thin avangin, hmun hrang hrangah khawtlangin buhseng huna seng thei lo emaw damlohna leh harsatna vanga buhseng thei lote hnatlangin an pui thin a. Ningani khan Farkawn Theirekawn Veng YMA Branch-te chuan an branch chhunga chhungkaw 1, damlohna avanga buh seng thei lo chu hnatlangin an buh an sengsak a, hnatlang hian YMA member 50 an thawkchhuak a; Farkawn Joint YMA hruaitute’n an pui bawk a ni.
Buh hi tin 180 vaw tlain an inah an thlensak nghal vek a. Farkawn Theirekawn Veng YMA Branch-te. hian kum tinin harsatna avanga buh seng tlai emaw buh seng thei lote an pui thin a, vawiin hian chhungkaw khat buh an sengsak leh dawn niin thu dawn a ni.
Comments are closed.