Ni 14.8.2020 (Zirtawpni)

Get real time updates directly on you device, subscribe now.

𝗖𝗢𝗩𝗜𝗗-19 𝗛𝗥𝗜 𝗘𝗡𝗡𝗔 𝗞𝗛𝗔𝗪𝗟 𝗟𝗢 𝗧𝗛𝗟𝗘𝗡𝗚 :
Nimin khan Covid-19 hri kai leh kai lo enfiahna tura khawl pawimawh TrueNAT khawl chuan Champhai a rawn thleng a, nimin vek khan heng khawl enkawltu turte chuan Lunglei-ah training neiin, khawl hmanraw hrang hrangte hi rawn thleng hnai tawh tura ngaih niin, karleh lam khian heng khawlte hi bun tan theih beisei a ni.
Champhai-a cham mek Health & Family Welfare Board vice chairman Dr. ZR Thiamsanga, Champhai North bialtu MLA hnen atanga thu kan dawn danin, Covid-19 hri kai leh kai lo enfiahna khawl TruneNAT bakah hian Bio-Safety Cabinet pawhin Aizawl a rawn thleng fel tawh a, District Hospital Champhai-a khawl bunna tur, laboratory atana ruahman Dental OPD building pawh tlema buatsaih leh cheibawl deuh a la ngai dawn a. Nimin khan heng khawl enkawltu tur Dr R.Vanlalchhuangi leh Technician pahnih – F. Lalnuntluangi leh Lalremfeli te chuan Lunglei-ah training neiin, an zo fel a. Hri kai leh kai loh enfiahna khawl bungraw hrang hrang hi rawn thleng kim hnai tawh tura ngaih niin, a hmunhma cheibawl zawh fel a, khawl a rawn thlen kim chuan a remkhawm leh buatsaih tan theih tawh dawn a. Karleh lam atang khi chuan heng khawl bunfel leh hmalak hi tan theih beisei a ni.
Hri kai enfiahna khawl hi Champhai-a bun ve thuai a nih theihna tura Champhai North leh South bialtu MLA ten theihtawp an chhuah avangin khawl chu rawn phurh thlen a ni ta a.
Nimin khan District 9 – Siaha, Lawngtlai, Hnahthial, Kolasib, Serchhip, Mamit,
Champhai, Saitual leh Khawzawla TrueNat khawl enkawltu tur, doctor leh technician te chu training pek fel an ni a. Dr. RSC Vanlalruati, Microbiologist, Civil Hospital, Lunglei chuan Lunglei-ah zirtirna hi a pe a ni.
𝗕𝗔𝗪𝗥𝗛𝗦𝗔𝗣 𝗛𝗠𝗔𝗟𝗔𝗞𝗡𝗔𝗜𝗡 𝗧𝗘𝗦𝗧 𝗡𝗘𝗜 :
Covid-19 hri leng mek laka Champhai district mipui himna tura Champhai Bawrhsap, Maria CT Zuali thupek bawhzuina kal zelah, nimin khan Champhai khawpui chhunga Sumdawng leh Mutia-te CMO Office kal tlangin Rapid Antigen Test hmanga enfiah an ni.
Rapid Antigen Test hi Tourist Lodge Champhai-ah neih niin, nimin khan Champhai khawpui chhunga Sumdawng mi 20, Mutia/porter mi 17 te bakah frontline worker 2, an vaiin mi 39 te Nasal Swab Sample lain Rapid Antigen Test tihsak an ni a, an result a negative vek a ni.
Hetihlai hian Champhai District atangin hnam dang COVID-19 kai mi pakhat hmuh chhuah a ni. Nilaini khan ZMC Laboratory-a RT-PCR khawl hmanga swab sample test zingah COVID-19 kai 1 hmuh chhuah thar a ni a. Hrivei hmuh chhuah thar hi Champhai District-a mi, hnam dang, kum 24 mi niin, World Bank hnathawk a ni a. Mualkawi daia Home Quarantine mek a ni a, hri a vei tih hmuh chhuah a nih veleh DCHC-ah dah luh nghal a ni a; mipui tan chi-aina tur a awm lo niin Dr R. Lianmawia, CMO chuan a sawi.
Covid-19 vei leh vei loh Rapid Antigen Test neih hi Champhai district-ah July Ni 22, 2020 atanga hman tan a ni a. RAT hmang hian nimin thleng khan mi 150 te endik tawhin, heng zinga mi 4 te chu Covid-19 an vei tih finfiah a ni.
𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Champhai Police-te chuan Nilaini khan inkharkhipna dan bawhchhia, vantlang hmuna hmai tuam lo mi 3 an man a, Rs. 100 theuh chawitir niin, an pawisa chawi hi a vaiin Rs. 300 a ni. Nilaini khan Mizoram hmun hrang hrangah dan bawhchhia mi 307 man an ni a, an pawisa chawi tlingkhawm hi Rs. 49,800 a ni.
𝗜𝗡 𝗥𝗘𝗣𝗢𝗥𝗧 𝗧𝗨𝗥𝗜𝗡 𝗛𝗥𝗜𝗔𝗧𝗧𝗜𝗥 :
August ni 1 atanga ni 10 inkara Sairang leh Sihphir pela kal Driver/handyman zawng zawngte leh August ni 10, 2020 atanga Champhai-a nitin mamawh rawn phur luttu Driver leh handyman, Vairengte-a test pal tlang lote tan Rapid Antigen Test tihsak tura ruahman a ni a. A chunga tarlan hun chhung leh hmun tlawhtu Rapid Antigen Test tih ngai Driver-te chu Dr Lallawmkima, DIPRO Champhai hnenah in report tura hriattir an ni.
𝗞𝗛𝗨𝗡𝗚 𝗛𝗥𝗔𝗡 45 𝗔𝗪𝗠 :
Champhai Police leh CID (Special Branch) Champhai tangkawp chuan nizan dar 6:00 vel khan Ruantlang dai, Zonunsanga Farm kiangah Sahbawn bawm 21 chhunga heroin (No.4) ni ngeia hriat, gram 252 a rit an man a. He ruihhlo neitu-a puh Lalengkima kum 40 s/o Remsanga (L), Mualveng chu man niin thubuai siamsak a ni. Heng ruihhlo an man hi Rs. 10,50,000 man vel ni a chhut a ni.
𝗞𝗛𝗨𝗡𝗚 𝗛𝗥𝗔𝗡 45 𝗔𝗪𝗠 :
Champhai district chhungah khung hran mek mipa 32 leh hmeichhia 13, an vaiin mi 45 an awm mek a. DPRC Institutional Quarantine Centre, Keifangtlangah mipa 15 leh hmeichhia 7, mi 22; Tourist Lodge Champhai Institutional Quarantine Centre-ah mipa 10 leh hmeichhia 5, mi 15; mahni ina in khung hrang mipa 4 leh Dedicated Covid Health Centre (Nursing School Building chung ber)-ah mipa 3 leh hmeichhia 1, mi 4 an awm mek a ni. 
𝗧𝗛𝗜𝗟𝗠𝗔𝗡 𝗧𝗜𝗧𝗢 𝗟𝗢 𝗧𝗨𝗥𝗜𝗡 𝗛𝗥𝗜𝗔𝗧𝗧𝗜𝗥 :
Legal Metrology Department chuan sumdawng leh dawrkaite Covid-19 hrileng avanga bungraw chawkluh harsatna denchhena an thil zawrh te tito lo turin a hriattir.
Mizoram puma Dawrkai leh nitin mawmawh zuartute, MRP aia sang leh buk diklova bungrua zuar leh hralh te chu The Legal Metrology (Packaged Commodities) Rules, 2011 leh The Legal Metrology Act, 2009 in a sawi angin pawisa chawitir leh lung in tan thlenga hrem theih an ni a. Heng dante hi bawhchhe lo tur leh bungruate to uchuak taka zuar lo turin an hriattir.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More