Ni 15.10.2020 (Zirtawpni)

𝗣𝗔𝗪𝗜𝗞𝗛𝗔𝗪𝗜𝗛𝗡𝗔 𝗧𝗨𝗥𝗧𝗨𝗧𝗘 𝗛𝗡𝗘𝗡𝗔𝗛 𝗭𝗔𝗡𝗚𝗡𝗔𝗗𝗔𝗪𝗠𝗡𝗔 𝗣𝗘 𝗗𝗔𝗪𝗡 :

Champhai District chhunga pawikhawihna tuar zangnadawmna dil 12 zinga 10 chu State Legal Services Authority (SLSA) hnena thlena, a tul ang a zangnadawmna pek tura pawm a ni.

Champhai District Legal Services Authority bultumin pawikhawihna tuara vanduai te’n zangnadawmna an

hmuh theih dan tur ‘Victims of Crime Compensation Scheme’ chungchang chu Ningani chawhnu khan Bawrhsap Maria CT Zuali hovin I&PR Conference Hall-ah ngaihtuah a ni. 

Lalrochami Ralte, Secretary, District Legal Services Authority (DLSA) kaihhruaia thutkhawmah hian misual kut tuara vanduaina tawkte hnena zangnadawmna pek dan tur chungchang rel a ni a, Undivided Champhai District atanga zangnadawmna dil mi 12 an awm a. Mizoram Victims of Crime Compensation (Amendment) Scheme, 2016 dungzuiin pawikhawih dan a zir zelin zangnadawmna pek zat turte bituk a ni a.

Pawikhawihna tuara zangnadawmna dil 12 te dilna chu ngun taka zirchian a nih hnuah heng zinga 10 te hi State Legal Services Authority (SLSA) hnena thlen a, a tul ang a zangnadawmna pek tura pawm a ni.

Zangnadawmna dil 12 zinga 4 hi Session Case, Court-in a dilsakte an ni a, Home in a dilsak 3 leh a tuartu lam atanga dil 5 an awm bawk. Vanduaina tawkte hi mi kut tuara thi, kutthlak tuar, pawngsual tawk leh naupang khuaikhemte an ni a.

Zangnadawmna mi 10 hnena pek tura ruahman hi a vaiin Rs. 31,25,000 a ni a. An tawrh nat dan a zira pek thin a ni a, Ningani a ngaihtuah dilna lut zingah hian a hniam ber Rs. 75,000/- atanga a sang ber Rs. 4,50,000 thlenga pek tura remtih a ni.

Zangnadawmna diltu hi BPL chhungkuaa mi an ni tur a ni a, pawikhawihna thlen atanga thla ruk chhungin lehkha ngai kimchang thil telin dilna hi thehluh theih a ni.

𝗦𝗛𝗚 𝗧𝗘 𝗛𝗡𝗘𝗡𝗔𝗛 𝗟𝗢𝗔𝗡 𝗣𝗘𝗖𝗛𝗛𝗨𝗔𝗞 :

Champhai RD Block hnuaia Mizoram State Rural Livelihood Mission (MzSRLM) chuan Champhai RD Block huam chhunga Self Help Group-te tan Loan pek chhuahna runpui ‘Credit Camp’ a buatsaih.

H.Lalchhandami, CEO, MzSRLM chuan khuallian niin a hmanpui a. Thu sawiin khuallian chuan, Champhai RD Block hnuaia Self Help Group-te hnathawh chu tha a tih thu leh Champhai RD Block Self Help Group Member-te chu nasa lehzuala hna an thawh chuan State lam hotute pawhin an rawn ngaihsak zel tur thu a sawi.

Credit Camp-ah hian Self Help Group 81-te tan Bank Loan Cheng Nuai 212 pek chhuah a ni a. Bank Loan hi Champhai RD Block hnuaia Bank Branch 6 – MRB Champhai, MRB Hnahlan, MRB Ruantlang, SBI Champhai, SBI Zokhawthar leh MCAB

Champhai atanga pekchhuah a ni a. Heng an thawhpui Bank Branch Manager-te hnenah hian ngaihhruina thilpek an hlan nghal bawk a ni.

𝗠𝗢𝗧𝗢𝗥 𝗗𝗔𝗡𝗡𝗔 𝗧𝗨𝗥 𝗜𝗡 𝗦𝗔𝗞𝗡𝗔 𝗧𝗨𝗥 𝗧𝗔𝗡𝗣𝗨𝗜𝗡𝗔 𝗗𝗜𝗟 𝗧𝗛𝗘𝗜𝗛 :

UD&PA, Champhai huaihawtin DUDO Office-ah nimin chawhma khan Champhai khaw chhunga VCP-te chu Champhai Solid Waste Management Bye Laws, 2020 hrilhfiahna hun hman a ni a. Swaach Survekshan 2021 atana pawimawhte sawiho nghal a ni. Hetihlai hian UD&PA Department hnuaiah vantlang motor dahna tura In sak tanpuina – Parking House Support Scheme (PAHOSS) – vantlang tana lirthei dahna tur in sakna atana sawrkara tanpuina Cheng Nuai 1 dil theihna chu kalpui a ni dawn a. PAHOSS dilna form hi UD&PA Office Chanem-ah Pisa kai hun chhungin lak theih a ni a. PAHOSS dilna thehlutte chu UD&PA Department-a thawkte’n a hmunah kalchilhin, an enfiah ang a, vantlang tana lirthei dahna atana hman tlaka an ngaih chuan PAHOSS hi pek an ni ang tih thu kan dawng.

𝗞𝗛𝗨𝗡𝗚𝗛𝗥𝗔𝗡 𝗭𝗔𝗧 :

Nimin khan Champhai District-a khunghranna hmun atangin mi 8 an chhuak a, mi 17 an luh belh thar thung a; mipa 37 leh hmeichhia 3, mi 40 khung hran mek an ni. DPRC Centre-ah mipa 6 leh hmeichhia 2; Tourist Lodge-ah mipa 3 leh hmeichhia 1 an awm mek a. Mipa 27 mahni ina khung hran an awm bawk a, Covid Care Centre, Nursing School building-ah mipa pakhat a awm mek bawk.

𝗙𝗔𝗜𝗡𝗔 𝗟𝗔𝗠𝗔𝗛 𝗛𝗠𝗔𝗟𝗔 :

Chhura Hmun Welfare Committee, Bethel Veng Champhai hmalakna in an huam chhungah faina lama hmalakna chu ngawrh taka kalpui zui zel a ni a. Kartin hunbi siamin faina hnatlang leh hlawhfa ruaiin faina lama hmalak thin a ni a. Mipui himna atan an huam chhung kawngpui kamah lirthei 407 chin chunglam dah an remti lo bawk a. Faina lama an hmalakna leh mipui himna tura an hmalakna hi veng dang ten ngai pawimawhsak turin an ngen tih thu kan dawng.

𝘼 𝙫𝙖𝙬𝙞𝙠𝙝𝙖𝙩𝙣𝙖 𝙖𝙩𝙖𝙣 𝙣𝙞𝙢𝙞𝙣𝙖𝙝 𝘿𝙖𝙣 𝙗𝙖𝙬𝙝𝙘𝙝𝙝𝙞𝙖 𝙢𝙖𝙣 𝙖𝙣 𝙣𝙚𝙞𝙡𝙤.