Ni 25.11.2020 (Nilaini)

Get real time updates directly on you device, subscribe now.

ZMC a phurh thlak Covid-19 vei mi 2 awm :
Nimin khan Champhai-a Covid-19 hri kai enkawl lai mi pahnih chu ZMC-a enkawl tura phurh thlak an ni.
Nimin zing dar 1:30 vel khan Covid Care Centre, Nursing School Building,
Champhai atangin mipa leh hmeichhe pakhat chu ZMC-a enkawl tura phurh thlak an ni a. Amaherawhchu, hei hi an
dinhmun that loh vang ni loin, a hmeichhia zawk hi natna dang nei sa a nih avangin, eng emaw thulha inenkawlna tha zawk a dawn theihna atana sawn a nih thu leh, mipa hi a
pa niin, a kalpui ve satliah a nih chauh thu anmahni enkawltute chuan an sawi a. An dinhmun a ngaihtuahawm lutuk lo tih an sawi.
Hetih rual hian nimin lama tarlan, Zokhawthar-a hri kai 7 hmuh an nih hnu khan hri kai pakhat hmuh belh leh a ni a. Heti hian tun dinhmunah
Champhai district chhungah hri kai mi 80 hmuhchhuah an ni tawh a. Hri kai enkawl dam hi mi 63 awm tawhin, ZMC-a enkawl tura phurh thlakte tel lo hian Champhai-ah hrikai enkawl lai mi 15 an awm mek a ni.
Hetihlai hian nimin khan Champhai District-ah hnuchhui kalpui leh hri kai leh kai lo enfiahin Truenat khawl
hmangin sample 11 enfiah lehin, RAgT hmangin mi 29 sample enfiah leh a ni a. Nimina sample enfiah zingah hian hri kai hmuh chhuah thar an awm lo tih thu dawn a ni.

Ei leh in tur an pe :
Lalrinmawia Hnamte, Mosia Agency, Champhai Vengthar te chuan a vawihnih nan Covid Voluntary Worker leh CCC team te tan nimin khan ei leh in tur chi hrang hrang an pe leh tih thu kan dawng.

Arte an sem
Nimin khan Agriculture Department hnuaia FOCUS Project 2020-2021 atangin Kawlbem, Teikhang, Hrianghmun, Mimbung, Lamzawl, Ngopa, NE Khawdungsei, Chiahpui leh Khawkawn-ahte thlanchhuah mi panga theuhte hnenah Arte 20, a chaw, a chaw pekna leh a tui pekna-te sem chhuah leh a ni.

Dan bawhchhia 600 tling tep
Champhai a Covid-19 No Tolerance Drive kalpui mekah nimin
khan Flying Squad team ten dan
bawhchhia mi 4 leh Covid-19 Executive Duty ten 1 an man a. Heti hian Champhai ah Covid-19 No
Tolerance Drive dan bawhchhia hi
mi 592 man an ni tawh a, an pawisa
chawi hi a vaiin Rs.76,400 a ni.

Buh sengin pui

Sesih Branch YMA-te chuan thihna avanga buh seng thei lo chhungkua buh sengin an pui.
Sesih Branch YMA-te chuan an Branch huam chhunga chhiat tawk chhungkua, Tiau zaua leilet buh seng zo hman lo te chu member 67 thawk chhuakin an buh an seng sak a. Buh hi ngui deuh tawhin seng harsa deuh mah se, Sesih Branch YMA te hian buh an ah hmabakte chu ah sakin, an vuak zawh sak nghal a ni.

Khung hran zat
Nimin khan Champhai district-a
inkhunghranna hmunah mipa 8 leh
hmeichhia 4 an luh belh a. Sorkar
khunghranna hmunah 42 an awm
mek a, in lama inkhung hrang 82
an awm bawk a. Hri kai enkawlna
hmun CCC-ah mipa 8 leh hmeichhia 7, an vaiin 15 an awm mek bawk a. Khunghranna hmuna awm hi an vaiin 143 an ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More