Zokhawtharah hrikai hmuhchhuah belh a ni :
Nimin khan Zokhawthar-ah Covid-19 kai mi pahnih hmuh belh leh an ni.
Nimin khan tun thla ni 25-a Zokhawthar-a Covid-19 hri kai hmuh chhuah mi 8- te bul hnaia awm, khung hran mek mi 34-te chu hri an kai leh kai loh enfiah a ni a. Mipa 1 leh hmeichhia 1 chu hri an kai tih hmuhchhuah a ni a. Nimin vek khan inenkawlna hmunah dah luh nghal an ni.
Hetiang a nih avang hian Zokhawthar VLTF chuan an khuaah inkharkhip an la puan chhunzawm zel a. Nimina enfiah loh mi 35 vel leh tuna hri kai hmuhchhuah tharte bul hnaia awmte leh a hmaa an lo enfiah tawhte chu karleh Thawhtanni khian a hlawmin
enfiah leh an ni dawn a ni.
Heti hian nimina hri kai hmuhchhuah tharte nen hian Champhai district-ah hri kai mi 82 an awm tawh a. Hri kai enkawl dam 63 awm tawhin, ZMC-a enkawl tura phurh thlakte chiiar tel lohin tunah hian hri kai enkawl lai
mi 17 an awm mek.
Rawn in rawlhlo turin hriattir :
Zoram Drivers’ Union Sub-Hqrs.; Mizoram Truck Owners’ Association Sub-Hqrs.; Mizoram Truck Drivers’ Association Sub-Hqrs. Champhai, EXIM, CIETU leh Syndicate-te chuan nimin khan joint meeting neiin, thuchhuah an siam a.
Myanmar nen insumdawn tawnna bungrua Champhai atanga khaw dang leh state danga an thawnchhuahna
kawnga harsatna siamsak leh siam tum an lo awm thin chu pawi an tih thu an sawi a. Pamham vanga harsatna siamsak thintute chu ti tawh lo tura an duh thu leh harsatna
an siamsak leh a nih chuan, tangruala an do-ho zel tawh tur thu an tarlang bawk.
Sawrkar Pisa fai endikna nei leh :
Champhai khawpui chhunga Sawrkar office hrang hrangte, Faina kawnga an hmalak dan te enin MJA, Champhai District chuan nimin khan a thawh hnihna atana Sawrkar Pisa hrang hrang an fang kual.
A thawh khatna atan MJA Member te hi thuang thumah inthen darhin Mizoram Sawrkar hnuaia office te hi an enkual vek a. A thawh hnihnaah erawh Covid 19 hripui leng avangin member zawng zawng kal lovin ruat
bik mi 6-te’n nimin khan endik hna hi an thawk a ni.
Nimin khan Sawrkar Office zawng zawng tlawh kual tawh lovin a thawh khatna endiknaa Office fai zual thlan
chhuahte an tlawh kual a, result an siam tawh dawn a ni.
Office fai endikna atan hian tehfung chi hrang hrang siam niin, kumin hian kum danga tel ngai lo, Covid-19 hripui leng mek chungchang-a office ten hma an lak dan chu telh a ni a. Hei bakah hian Office Staff mila inthiarna
neih dan te, Tui thianghlim an hniang hnar em tih te, tuichhe paihna a mumal leh mumal loh te, faina lam hawi poster tar leh Bawlhhlawh tawih thei leh thei lo sawngbawl dan te telh a ni bawk a.
Office thenkhat chuan hma an lak that viau laiin, hma la mumal lo pawh an awm nual tih hmuh a ni a. Covid-19 hripui leng vanga Pisa inkaichhawk te a tul thin avangin kumin hian office tihfai kawngah hma lak a harsa deuh niin sawrkar hnathawkte chuan an sawi.
Minister rawn haw lawk dawn :
Champhai South Bialtu MLA, TJ Lalnuntluanga chuan vawiin hian a bial chhunga hmalakna hrang hrangte enfiah leh SBI Bethel Branch hawng turin Champhai a rawn pan dawn.
Minister TJ Lalnuntluanga hi tukin dar 5:30-ah Aizawl atangin Champhai panin a lo chhuak ang a, Champhai a
thlen veleh hian Kelkang leh Dilkawn inkar leh Tlangsam leh Zotlang inkar kawng laihte a hmunah kalin a enfiah nghal ang a. Naktuk chawhma lamah Vengthar leh Zote inkar kawng laih zauh tur a enfiah hnuah GM HSS NSS
hruaitute nen New Champhai-a waiting shed sakna tur an en leh ang a; chhun dar 12:30-ah Bethel kawnah SBI Bethel Branch hawnna hun a hmang leh ang a; hemi hnu hian Champhai chhuahsanin Aizawl a pan leh nghal ang.
Minister hi Road & Infrastructure Development Board Vice chairman, Er. Lalzirliana, MLA chuan a rawn tawiawm dawn a ni.
Khapna thupek:
Champhai Bawrhsap, Maria CT Zuali chuan Krismas leh Kum thar inkarah puakthei leh hal mawi chi hrang hrang leh naupang silai lem, a mu kap chhuak theite hman leh lakluh khapna thupek a chhuah.
Thupeka tarlan dan chuan Champhai district mipuite’n hlim leh thlamuang taka hunpui an hman theih nan leh hri inkai darhna a thlen nasat loh nan, Krismas leh Kum thar vuakvetah kum danga khap a lo nih thin angin, halpuah leh hal mawi chi hrang hrang, naupang silai lem, a mu kap chhuak thei leh sky lantern-te chu lakluh leh zawrh khap tlat a ni a. Thupek hian chhuah a nih atanga thla 2 chhung a huam ang a; thupek zawm lote chu dan hmanga hrem an ni ang.
Gas trip khat :
Vairengte supply checkgate report-in a tarlan danin niminpiah zing dar 9 atanga tukin dar 9 inkar thleng khan gas phur lir thei 25 chuan Mizoram an rawn lut a. Heng lirtheite hian a vaiin gas bur 8,064 phurin, heng zinga gas trip 1, bur 300 chu Champhai Mizofed ta tur a ni a. Gas bur hi Champhai phurh thlen a nih hnuah a tul angin sem chhuah zui a ni ang.
Khung hran zat :
Champhai district-ah mipa 126 leh hmeichhia 14, mi 140 khung hran an awm mek.
Nimin khan Sawrkar inkhung hranna hmun atangin mi 7 an chhuak a, mi 2 an lut ve leh bawk a. Heti hian khung hran mekte zinga mi 37 hi Sawrkar inkhung hranna hmuna awm an ni a; in lama inkhung hrang hi mi 84 an awm bakah; hri kai enkawl lai mi 17,
mipa 9 leh hmeichhia 8 an awm
mek bawk.
Dan bawhchhia man :
Champhai a Covid-19 No Tolerance Drive kalpui mekah nimin khan Flying Squad team ten dan bawhchhia mi 1 leh Covid-19 Executive Duty ten 2 an man a. Heti hian Champhai ah Covid-19 No Tolerance Drive dan bawhchhia hi mi 595 man an ni tawh a, an pawisa chawi hi a vaiin Rs. 76,700 a ni.
E/Roll hearing nei :
Nimin khan AERO Benjamin Zalawma Ralte, MCS hoin Zawlsei, Khawbung leh Khuangthinga kum tling thar leh electoral roll-a luh dilte enfiah an ni a. Document fel lote chu nei thuai tura tih niin, Electoral Roll-a awm, thi
tawhte chu Roll atanga paih an ni
a; hmun danga pêm tawhte pawh
anmahni pawmpuinaa paih an ni.
Comments are closed.