Ni 4-8 August 2008 Champhai Thilthleng

4.8.2008 (Thawhtanni)

Thukhawm dawn
Vawiin chawhnu dar 2:00 hian Vengthlang YMA Runah Champhaia Commercial Gas Connection neitute leh a nei awm chi te chu NGO Co-Ordination Comt. Executive COmmittee ten thil kalphung an sawipui dawn.
…………………………………………………….
Scho. lak theih
Vawiin atanga August ni 8 thlengin SJSRY Cell, UD& PA Department, Champhai hnuaia BPL Family atanga Trade chi hrang hranga Training te tan Scholarship/stipend Office hun chhung in lak theih a ni ang. Training Centre thlan te tan pawh a chunga hun tarlan chhung hian attendance register kengin, training fee lak theih a ni bawk.
…………………………………………………….
In thiat dawn
Pu Hrangkhuma (Patea), Champhai Venglai te In leh a vel min nasa chuan an In chu chenna atana hlauhawm khawpin a awm a, nimin tlai khan an bungrua te thiar chhuakin an In an riah rauh san a, vawiinah an In hi thiat turin ruahmanna an siam.
…………………………………………………….
A hun an sawn
Nimin tlai khan CDVA hruaitute thukhawmin, Independence Day Volleyball tournament neih hun tura an lo ruahman, August ni 5 chu ruah sur duh lutuk avangin Aug.7 ah sawn hlat phawt nise an ti. He inelnaah hian Mipa team 12 leh Hmeichhe team 8 ten an tel tur thu an tichiang tawh a, a tel tur ten vawiinah entry fee pek fel vek tawh tur a ni e.
…………………………………………………….
I/Day Basketball
CDBBA chuan August ni 8, 2008 Dar 2:00 PM hian Kahrawt Field ah Independence Day Basketball Tournament affiliated Club te tan a buatsaih leh dawn a. Ni 7August, 2008 ral hma ngei hian CDBBA Secretary Pu R.Lalbiakzuala hnenah Entry Fee Rs. 150/- leh Security Rs. 50 thehluh vek tur a ni.
…………………………………………………….
MNF Chanchinbu
Vawiin chawhma dar 11:00 hian MNF Hnam Run-ah MNF Champhai South Block Chanchinbu ‘Arsi’ tih chu MNF South Block Adviser Pu Khuangluaia’n a release dawn. He hun hmanpui tur hian a duh apiang tel turin an sawm a, MNF party member te a tam thei ang ber kal turin an hriattir bawk. Chanchinbu tlangzarh inkhawm hi Pu Lalsanglura Zote, MNF South Block vice president in kaihruaiin, Pu HL.Malsawma, Editor, Arsi chuan report a pe ang.
…………………………………………………….
Mipuite tan Champhai Officers Club
Inrinni chawhnu khan Champhai Officers Club member te chuan Zote IIDC Conference Hall-ah General Assembly neiin an pawl inkaihhruaina dan (Constitution) thlir hovin an pawm nghal.
Inkhawm kaihruaitu, an pawl President Er.Lalro-thanga chuan Champhai Officers Club-ah hian Champhai District chhunga Officer member 72 an awm mek thu te, he pawl hian Champhai district chhung hmasawnna leh mipuite tana tangkai zawka officer ten rawng an bawl theihna tur kawng ngaihtuah chu a tum ber a nih thu tarlangin ‘Mipui tana hnathawh’ tih chu an thil tum a ni, a ti. Sorkar Officer te mipui tana rawng an bawlnaah inpawh tlang taka awm a tul thu tarlangin, Officer te chu sorkar chhiah-hlawh (servant) kan ni a, sorkar chu mipuite an ni a, mipuite tana rinawm, taima leh dik taka rawngbawl chu kan tih tur pawimawh ber a ni a, rawng kan bawl sak mipuite tan tangkai thei ang ber tura kan in ruahman sauh sauh a tul a ni, a ti.
Pu F.Lalhuliana, District S.P.leh he pawl adviser ni bawk chuan thu sawiin Sorkar department hrang hrang ten anmahni hna theuh tluang taka an thawh theihna tura hmalak chu Police tih tur a nih thu te, Department hrang hrangin mipui tana hna an thawhnaah harsatna, misual emaw, hel emaw, mi diklo te lak atanga an tawk emaw, an tawk dawn emaw a nih chuan Police te chu tanpuitu an nih thu tarlangin, harsatna an tawh hnu chauh a Police te pun lova, harsatna an tawk dawn nia an hriat pawha Police te hrilh hriat nachang hre turin kalkhawm Officer te chu a chah a ni.
He General Assembly ah hian pawl inkaihhruaina Dan lo duan sa tawh chu enhovin siam that ngai laite siam thain belh ngaite an belh bawk a, lungrual takin an pawm. Pu K.Lalrintluanga, DEO, he pawl Treasurer ni bawkin lawmthu sawiin kalkhawmte a tin a, zaithiam Vanlal-malsawmi leh Laltlanliana ten zaiin kalkhawmte an awi a, tlaiah zanriah hlim takin an kilho nghal a ni.
…………………………………………………….
MMEM-in hmalak zelna tur thlirho
Inrinni khan Mizoram Media Evangelical Ministries (MMEM) Associate Hqrs. Champhai Executive Ciommittee chu Kahrawt YMA Hall-ah an thukhawm.
He meeting-ah hian an pawl hmalakna leh kal zel dan turte an sawiho a. MMEM Office/Dawr chu CHANEM building-ah hawn ve nise, hei hi DLAO hnenah dil nise an ti a. Khawzawlah branch thar hawn dan ngaihtuah nise, hei hi a rang thei anga bawhzui nise. Sum mamawhna avanga sorkar department hrang hrangah advertisement dil nise an tih chu department thenkhat ten an pek tawh thu leh hemi kawnga hmalak zui zel nise. Technical Assistant lak chungchang chu tun dinhmunah MMEM hian sum a la neih mumal loh avangin thahnemngaia he hna lo chelh mektu Pu Lalchhan-hima Zofa (Teta) chu tlawm-ngai thawk zui zel tura ngen nise an ti a, amah pawh hian hei hi a pawm nghal bawk.
…………………………………………………….
Tanpuina pe
Agriculture Department hnuaia IWDP kaltlanga Loneitute hnena tanpuina chu Inrinni khan sem chhuak a ni a. Inrinni khan Tuipui Project hnuaia tlangram loneitu mi 45 te hnenah first instalment Rs. 3000 pekchhuah a ni a, an hnathawh te enfiah a, thawk tha tawka ngaihte hnenah 2nd installment Rs. 3000 dang chu pek zui leh an ni ang tih thu kan dawng.
…………………………………………………….
Fam chang
Nl.Lalrammuani(27) D/o Pi Rualchhingi, Kahrawt Dawr kual chu Kal natna avangin nimin chawhnu dar 1:00 vel khan Champhai damdawiin ah a boral a, Vawiinah Kahrawt Thlanmualah vuiliam a ni ang.
…………………………………………………….
Retreat nei zo
Ni hnih awh Champhaia Catholic Kohhran ten Retreat an neih chu nizan khan Parish hall ah zawhfel a ni a, nimin chawhnu lam khan tihdam rawngbawlna hun hmangin mi thahnem takin Pathian tihdamna an chang.
…………………………………………………….
MZP Committee
Vawiin tlai dar 3:15 hian MZP Hqrs. Champhai chuan an office, Pisa Pui ah committee an nei dawn a. Hetah hian Career Guidance buatsaih chungchang leh an pawl thil pawimawh te an sawiho ang.
…………………………………………………….
Congress Comtt.
Vawiin chawhmauanga Champhai Postmaster chuan nimin meeting ah hian tarlangin, mitin, a te ber atanga lian ber thlengin he department an nghen hnaih theihna turin hma lak thar a ni ang, a ti.

5.8.2008 (Thawhlehni)

Petrol tha chi
Champhai Oil Depot-a tuna Petrol an neih lai chu an hralh zawh hnuah Petrol tha a rawn thleng dawn a, chu chu Rs.53.02 in an hralh chhuak tawh ang a; Diesel erawh a ngaiin a kal rih ang.
…………………………………………………….
MNF chanchinbu
Nimin chawhma khan MNF Hnam Run-ah MNF Champhai South Block Chanchinbu ‘Arsi’ tih chu MNF South Block Adviser Pu Khuangluaia’n a release ta. Chanchinbu tlangzarh inkhawm hi Pu Lalsanglura Zote, MNF South Block vice president in kaihruaiin, Pu HL.Malsawma, Editor, Arsi chuan report a pe a ni.
…………………………………………………….
I/Day Football
Nimin atang khan CDFA buatsaih Independence Day Football Tournameht chu Chhangphut Field-ah khelh tan a ni a. He tournament hi 1st division club te tana buatsaih niin, nimin khan match 2 khelh a ni a. Champion lai Venglai SC chu Youngers chuan 1-0 a hnehin, Bethel S/C leh New Champhai S/C te chu 1-1 in an in draw a ni.
…………………………………………………….
Ran chhiah khawn
DLAO chuan thuchhuah siamin Champhai District chhunga V/C zawng zawngte chu an huam chhung theuh ah Ran chhiah khawn turin a hriattir a. Ran chhiah khawn lo V/C te chu July atanga September, 2008 chhung V/C lawmman pek an nih loh tur thu a hriattir nghal bawk.
…………………………………………………….
Crusade nei mek
Vengthlang Presbyterian Kohhran chuan Mizoram Synod in MLA inthlan kumina neih hmaa Revival Team hmanga Mizoram puma rawngbawl tura a lo rel tawh bawhzui nan Inrinni atanga tun thla chhung hian an bial chhungah Sinners Friend Team te nen Crusade an nei dawn a. Team meber 6-te chu zirtawpni kalta khan Champhai lo thleng tawhin tunah hian Vengthlang Koh-hran ah Crusade an nei mek.
Vengthlang kohhran ah hian Pathianni lo awm tur thleng khian Crusade hi neih a ni ang a. Aug ni 11-17 chhung khian Electric veng kohhran ah, Aug. ni 18-24 chhungin Vengthlang North leh Aug. ni 25-31 chhungin Venglai ah te Crusade hi neih a ni ang.
…………………………………………………….
Zirtirtu training
Vawiin atanga zirtawpni thleng khian SSA Training Hall-ah Champhai Block huam chhunga P/S Mizo subject teacher te tan training neih a ni ang.
…………………………………………………….
MZP-in Vai dinhmun enfiah dawn
Nimin khan MZP Hqrs. Executive Comt. chu MZP Pisa puiah an thukhawm a, he an committee, an President Pu Tlangromawia kaihhruaiah hian Kumin August – September thla chhungin SCERT bul tumin High School leh Higher Secondary School zirlaite tan Career Guidance buatsaih nise, an ti a. Hemi bakah hian Champhai khaw chhunga Non Mizo (Vai) awm zawng zawng hming List, an hnathawh leh an awmna hmunte nen chiang taka record fel nise tih te, Executive atanga Judiciary lakhran a nih ruala Champhai DC Court a thuneihna Aizawla sawn chungchangah mipui harsatna thleng thei te Chief Minister hnenah thlen nise tihte leh High School chin chunglamah Medium of Teaching atan English ngei hman a nih theihna tura hmalak nise tihte an rel.
…………………………………………………….
Champhai-ah Post Forum din thar
Postal Department chuan mitin in he Department tangkai zawka an hman theih dan tur tun hnai khan duang chhuakin, India rama Post Office thlan chhuah bik 200 te chu he Post Forum hmalakna hnuaiah thuam that leh tih changtlun tum a ni. Heng hmunahte hian Customer Care Centre te din a ni ang a, a tul anga thuam that a ni bawk ang.
Post Office thuam that tur zingah Champhai leh Lunglei Post Office te chu thlan chhuah a niin hma la turin Champhaiah Post Forum din fel a ni a, he Post Forum hi nimin tlai khan an thukhawm nghal a ni. Vawiin hian India hmarchhaka Postal Department hotu lu ber- Chief Postmaster General Shillong atangin a lokal dawn a, a hnena rawtna thlen tur thil tam tak nimina Post Forum thukhawm chuan an duang chhuak a ni. India ram mipuiten Postal Services tangkai zawka an hman theih dan tur kawng chak zawka duan chhuah a nih tur thu Pu Lalrintluanga Champhai Postmaster chuan nimin meeting ah hian tarlangin, mitin, a te ber atanga lian ber thlengin he department an nghen hnaih theihna turin hma lak thar a ni ang, a ti.
…………………………………………………….
Champhai Cong. South Block thukhawm
Nimin khan Champhai South Block Congress Executive Comt.Venglai Community Hall ah thukhawmin, Party hmalak dan tur thenkhat an duang a.Tun hnaia MNF in an Block huam chhunga mithar 300 chuang an lawm luh zingah an mi leh sa kal peng mi 10 vel an awm nia an hriat thu an report a. Executive atanga Judiciary lakhran a nih ruala mipui te harsatna thlen thei zawnga Court thuneitu sang Champhai a dah a ni lo chu an hriat thiam loh thu leh Addl. District Sessions Judge tal Cham-phaia dah tura sorkar an phut thu resolution ah an tarlang.
…………………………………………………….
MJA member tling
Law & Judicial Deptt. hnuaia LDC lak tur result chu tihchhuah a ni ta a, Cham-phai District MJA Secretary R.Lalliankima S/o R.Darkhuma(L) leh F.Lalthenlova S/o Thanliana (Dumde) te chu a ti tha zual 4 zingah an tling tih thu kan dawng.
…………………………………………………….
Champhai che tha
Aizawla Independence Day Football Tournament khelh mekah nimin khan Kulikawn S/C chuan Luangmual FC chu 5-1 in an sawp a. Kulikawn S/C ah hian Champhai player 7 lai an tel a, an vai hian an khelh kim vek bakah an khel tha hlawm hle niin thudawn a ni. Kulikawn S/C ah hian foreign player 3 lai an tel bawk a ni.
…………………………………………………….
Fam chang
Nimin zing dar 3:00 vel khan Pu Lalzama kum 46 S/o Laiawrha, Buangtlang veng chu Cancer natna avangin a boral a, nimin khan vuiliam nghal a ni.
Lalrindiki, kum 1 leh thla 4 mi Pu C.Challiana, Veng-thar fanu chu nimin tlai dar 5:00 vel khan Champhai Damdawi inah Kalna vangin a boral a, vawiin hian vuiliam a ni ang. Pu Challiana te hi Bethel venga kan chanchinbu semtu Pu Biaka te chhung a nih avangin vawiin hian Bethel venga kan chanchinbu latu te hnenah Pu Biaka hian chan-chinbu a sem theih dawn loh avangin in hriatthiamna kan ngen e.
…………………………………………………….

6.8.2008 (Nilaini)

YMA Phone thar
YMA Sub-Hqrs. Champhai Office chuan phone thar neiin, an phone number chu 234313 a ni e.
…………………………………………………….
Painting Competition
Art & Culture Deptt. chuan tunkar Inrinni chawhma dar 11:00 khian Govt. P/S II Vengthlangah Class X hnuai lam tan Champhai District Painting Competition a buatsaih dawn a. Lawmman tha tak an buatsaih dawn bakah heta ti tha 3-te chu Kolkata-ah Excursion neihpui an ni ang.
…………………………………………………….
Hindi Interview
Champhai District chhunga Primary School Hindi Teacher lak tura interview chu tun thla August ni 12 leh 13 khian DEO Office, CHANEM-ah neih a ni dawn a. August ni 12 khian Serial No. 1 atanga 110 ten neiin, ni 13-ah Sl No. 111 atanga 193 leh Additional, district dang atanga Champhaia interview diltute tan neih zui leh a ni ang.
…………………………………………………….
Training nei tan
Nimin khan Champhai SSA Block huam chhunga Primary School Mizo subject teacher te tana training chu SSA Training Hall-ah tan a ni a. Training hi tunkar zirtawpni thleng khian neih a ni ang a, mithiam hrang hrang – Pi VL.Rochhari, Pu C.Lal-siamthanga, Pu H.Lalhming-hlua, Pu Lalbiaktluanga, Pu RL.Chhuanawma leh Pi Laltlanthangi ten an pe dawn a ni. He hunah hian zirtirtu 38 an tel a ni.
…………………………………………………….
Result puang
Tunlai hian Champhai khaw-pui chhunga school hrang hrang ten second term exam neih zawh tak result chu an puang chho mek zel a. Hetihlai hian DEO Office atanga scholarship diltu zirlai pawh an thahnem tawh hle.
…………………………………………………….
Stand thar siam
Champhai District SP chuan Motor Vehicle Act 1958 Dan hmangin Champhai to Zotlang Pu Vanlalrova In ep ah leh awmpui phei King Solomons School bulah Rickshaw stand thar tur a siam.
…………………………………………………….
DC in vawiinah tlangzarh dawn
Vawiin chawhma dar 11:00 hian DSYO Training Hall, CHANEM-ah kum 10 chhunga Mizoram sorkar-in hmasawnna hna a thawh chi hrang hrangte tarlanna lehkhabu ‘Kum 10 chhunga Mizoram hmel danglamna’ tih lehkhabu chu Champhai DC Pu TV. Fambawl chuan a tlangzarh dawn a. He lehkhabu tlangzarh inkhawm hi Pi K.Laldingliani, IPRO Champhai chuan kaihruaiin, Khuallian thusawi ngaihthlak bakah Pu V.Suakbuanga, Govt. Champhai College chuan keynote address a pe ang a, Pu Lalhmingmawia Pachuau,President MJA Champhai District chuan lawmthu sawina hun a hmang bawk dawn a ni.
…………………………………………………….
Buhfai sem sawiho
Nimin khan Champhai DC Pu T.V.Fambawl hovin Champhai District chhunga thla khata Rs. Sing khat lalut phalo chhungkua te hnena Buhfai a thlawna sem mek chungchang an sawiho. He meeting-ah hian a hmasa-a ruahman leh beisei lawk aiin tun dinhmunah hian chhungkua in report an pun tam tak avanga harsatna awm theite an sawiho niin thudawn a ni.
…………………………………………………….
DC Road kawnglaih enho leh dawn
Tukin zing kar hian Champhai NGO Co-Ordination Committee hruaitute leh DC Road laih hna thawktu Contractor ten kawngpui sial lai mek, duhthu la sam lote an en dawn.
Rs. Nuai 12 senga kawngpui laih zau hna hi Contractor chuan PWD a thawktuten Estimate an siam ang thlapa zo fel tawh ah a inngai a, mahse, mipui lam atangin sum bel zat leh hnathawh hnuhma hi inmil lova hriat a nih avangin NGO Coordination Comt. chuan zau leh tha zawka laih zawm leh tulin a hria a, mipui lungdamna tling a laih zau a nih hma chuan Final Bill pechhuak lo turin DC hnenah an lo ngen tawh a ni.
Nimin chawhnu khan NGO hruaitute leh Contractor te hian Pu Chalbawiha In ah hemi chungchang hi an sawiho a. An thu tlukna angin tukin zingah kawng laih mek hi an thlirho leh dawn ta a, laih zauh ngai zual laite thlangin hna thawh nawn leh a ni ang.
…………………………………………………….
Volleyball Inelna
I/Day lawmna puala Volleyball inelna chu naktuk ah Bethel Venga Chhura Hmun Court ah khelh tan a ni dawn ta. He inelnaah hian Mipa team 12 leh hmeichhe team 9 an tel dawn. Vawiin hian CDVA Executive hnatlang Court hmunah koh a ni a, Executive Comt. member te kal theuh tura beisei an ni e.
…………………………………………………….
SI 32 la leh dawn
Mizoram Police hnuaiah ASI tur mi 32 lak a ni dawn a, Vawiin (6.8.2008) atangin Police Hqrs. Khatla ah dilna form Rs. 20 a leichhuah theih a ni a, HSSLC/PUC tan dil theih a niin Physical Test a lo tling tawh tan Test nawn a ngai tawh lovang. Interview thei turte hming chu August 29 ah tarchhuah a ni ang a, Sept. ni 1 atangin Interview neih tur a ni. Hrechiang duhin SP Office ah zawhfiah theih a ni.
…………………………………………………….
IR Interview
5th IR Bn.nih tumte tan vawiin ah SP Office ah Medical Test neih tur a ni a, August ni 7 ah Personal Interview SP Office ah neih leh nghal tur a ni ang.
…………………………………………………….
ATM Card lam r’u
Lalchhungi Kullai, Champhai Rahsi veng leh Samuel Zodinsanga, Awmpui veng te Dakpu ten an zawn hmuh theih mai loh avangin an ATM Card, Post Office-ah lam tura hriattir in ni e.
…………………………………………………….
Ui chhar
Jail vengah Ui chhar a ni a, a neitu chuan a nihna dik tak sawiin, Pi Vaineli, Jail Veng hnenah tunkar chhunga lam tur a ni e.
…………………………………………………….

7.8.2008 (Ningani)

Kum 10 chhunga Mizoram sorkar hmalakna ziahna Lehkhabu District Bawrhsap-in a tlangzarh
Champhai. Aug. 7 : Mizoram sorkar-in kum 10 chhunga hmasawnna hna a thawh dan ‘Kum 10 chhunga Mizoram hmel danglamna’ tih lehkhabu chu nimin khan District Bawrhsap Pu T.V.Fambawl chuan DSYO Training Hall, CHANEM Building-ah a tlangzarh.
Thu sawiin Pu TV.Fambawl chuan, Mizoten thil chhinchhiah leh record nachang kan hriat loh laia Information Department-in kum 10 chhunga sorkar hmalakna hrang hrang tarlanna a bua an siam chu lawmawm a tih thu asawi a. He lehkhabu hian sorkar-in eng ang chiahin nge mipuite tana hna a thawh, eng hmasawnna nge kan neih ? tih chu a hriat theih dawn a ni, a ti a. He lehkhabu atang vek hian sorkar hmalak tawhna that tawk leh tawk loh te a enlet theih dawn a, insiam that nan a tangkai tak a ni, a ti. Sorkar lo awm leh turte tan pawh tangkai taka chhawr theih tur, sorkar hmasa hnathawh tawh leh target mumal tak an neih theihna tur a ni a. Hetiang lehkhabu tangkai tak hi sorkar apiang hian an term tawp, kum 5 dan zela buatsaih theih nise a duhawm tih sawiin, sorkar dinglai tan pawh campaign-na tha leh remchang tak a ni dawn a. Mizoram chhunga sorkar hmalakna tlangpui chauh tarlanna ni mahse mipuite pawhin inthlan lo awm leh turah tu party nge kan vote ang? tih pawh mipuite hian kan hre thei dawn a; mipuite pawhin inthlan hunah hian ngaihtuahna fim tak kan hman thin a tul a ni, a ti.
A sawi zelnaah District Bawrhsap chuan, sorkar chu a hnuaia hnathawkte thawh tur fel taka ruahman a, , zalen taka an thawh theih nan an buatsaih a tul a. Chutiang bawk chuan Officer te pawhin an hnuaia thawkte hnathawh tur buatsaiha, ram tana tangkai leh chhenfakawm thawk chhuak thei tura ngaih-tuahna kan sen a tul a; mahni hna pangngai thawh mai hi a tawk lova, Officer fel leh tha nih mai a tawk hek lo, mipui tana tha leh ram tana tha a nih chuan mite huat deuh leh sawisel nih pawh kan huam thin tur a ni, a ti a. Tihdan phung pangngai piah lama hmasawnna tur tha ngaihtuah chhuah thiam hi Officer tha leh tha lo tehna a ni, a ti bawk.
Pu V.Suakbuanga, Govt. Champhai College Principal chuan keynote address sawiin, kum 10 chuang Champhaia a awm tawh thu leh a awm tirh leh tuna Champhai dinhmun inthlauh tawhzia, hmasawnna chak tak a nih thu a sawi a. Mi tam takin sorkar sawiselna ringawt kan zawng thin a, hei hi a dik ber lo, an hnathawh tha pawh kan sawi ve tur a ni, thil reng reng hi a eng zawngin kan thlir tur a ni, a ti a. He lehkhabu hmang hian department hrang hrangte nen kan inkhai-khin ang a, tha zawk leh chak zawka hma lak tum ila, kan department in hma a sawn chuan Champhai hian hma a sawn a ni ang, a ti.
He lehkhabu tlangzarh inkhawm hi Pi K.Lal-dingliani, DIPRO chuan kaihruaiin, Pu HKL. Thanga leh Pu H.Lal-chhuanawma, DLAO te pawhin thu sawiin sorkar hmalakna hrang hrang tam, tak an tarlang a, Pu Lalhmingmawia Pachuau, MJA Champhai District President chuan lawmthu sawiin hun a hmang bawk a ni.
…………………………………………………….
Boxing-ah
Champhai che tha
Aizawla Mizoram Open Boxing Championship khelh mekah Champhai aiawha kal mi 4-te chuan final an lut vek a. An zinga pahnih Lalruat-puia, Hmunhmeltha leh Vanhlimpuia, Tuipui te chuan nimin khan final-ah an bitum hnehin an champion a. Laldinmawia, Tuipui leh Lalthianghlimi, Tuipuite chuan vawiin hian final an khel leh dawn a ni.
…………………………………………………….
Doctor thar
Champhai NGO Co-Ordination Comt. in Health Minister hnena ngenna a siam angin Champhaia doctor indaih lohna phuhrukna turin Dr Shalomi, BDS chu Champhaia awm turin tihfel a ni ta a, NGO hruaitute an lawm hle.
…………………………………………………….
Zirtirtu ruai ang
Govt.Champhai H/S a zirtirtu 3 chu B.Ed.training zawm tura koh an nih rualin zirtirtu pakhat chu damlohna avangin sikul a kai mumal thei lova. Hei vang hian Mathematics zirtirtu bikah harsatna an tawk mek a. Nimin khan he sikula zirlai nu leh pa te chu kohkhawm an niin zirtirtu indaih loh phuhrukna sawiho a niin sorkar lam atanga zirtirtu rawihna tur sum a awm lo nia sawi a nih avangin zirlai nu leh pate chuan zirtirtu thla 3 chhunga rawih belhna tur sum thawhkhawm nise, an ti.
…………………………………………………….
Pensioner te tan
State Bank Champhai Branch ah Direct a Pension latu January -0 February 2008 a Arrear la lo zawng zawngte chu ni 9/8/2008 ral hma ngeiin Pu JC.Rohnuna Awmpui Veng hnenah in report tur ni e.
…………………………………………………….
IR lak chhunzawm
5th IR Bn. din thar tur atana intlar mek chu chhunzawm zel niin, ruahman lawk ang chuan SP Office ah nimin khan Medical Test neiin, vawiinah Personal Interview SP Office ah vek hian neih leh nghal a ni ang.
…………………………………………………….
V/ball vawiinah
Vawiin chawhma dar 10:0 atangin Independence Day Volleyball Tournament Chhura hmun Court, Bethel vengah khelh a ni dawn ta a, vawiina inkhel turte chu:-
…………………………………………………….
Kahrawt Vs Bethel(M)
Tlangsam Vs Vengsang (M)
Khuangleng Vs Bethel(W)
Kahrawt Vs Ngur (W)
Kanan Vs College (W)
Zotlang Vs Venglai(M)
Vengthlang Vs College(M)
…………………………………………………….
Live Phone
T.Melody hotupa Biang biakna leh Phone hmanga kawmna hun zanin dar 7:30 hian TKS Vision Zotlangah buatsaih a ni dawn a, Phone duhte tan 235234 ah biakpawh theih a ni ang.
…………………………………………………….
I/Day Basketball
I/Day Basketball tournament chu naktuk hian Kahrawt Field-ah tan a ni dawn a. He inelna neiha tel tum team te tan vawiin thleng hian CDBBA hruaitute hnenah Entry Fee pekluh theih a ni e.
…………………………………………………….

8.8.2008 (Zirtawpni)

IR Interview nei
Nimin khan SP Office, Keifang tlangah 5th IR lakna tur atana Personal Interview neih a ni a, he hunah hian IR tur atana intlar te an kal tha hle a ni. Tarlan tawh angin niminpiah khan SP Office-ah vek hian IR lak tur atana medical test chu neih a lo ni tawh bawk a ni.
…………………………………………………….
Kawng nawr zau
DC Complex panna kawng pui chu NGO hruaitute ngenna angin Contractor in a laih zauh belh leh a, Kawng zim leh kawi ulh, ngaih mawhawm zualte khawl hmanga nawr zau leh a ni.
…………………………………………………….
Lei dawhna sum
Khawzawl leh Neihdawn inkara Tuimuk Lei dawhna tur sum pek hmasak chuan a daih loh avangin tunhnai khan pek belh leh an ni. Neihdawn leh Khawzawl inkar kawng thenfaina hna chu BDO Khawzawl emaw, VCP Neihdawn ten hma an lak thiam dan ah thui tak a innghat a ni tih thu kan dawng.
…………………………………………………….
Officer zin chhuak
Pu Lalrothanga EE leh PHE SDO te chu Aizawlah Meeting pawimawh neiin an thangbo mek a, PU H.Lal-chhuanawma DLAO pawh nimin khan meeting pawi-mawh a telin Aizawlah a cham mek a. Pu K.Lal-rintluanga DEO chu High School Adhoc Grant in aid dawng thar tur Headmaster te tana Screening neihna Board member a nih anga tel turin Aizawlah a cham mek bawk.
…………………………………………………….
Nu leh pa kokhawm
Vawiin chawhma dar 10:00 hian Home Mission School chuan Parents-Teachers’ Meeting an school-ah an nei dawn a, zirlai nu leh pate kim taka kal turin an hriattir.
…………………………………………………….
Champhai Boxer che tha hle
Aizawla Mizoram Open Boxing Championship nimina khelh zawh takah Champhai aiawha kal mi 4-te chuan Gold Medal an la kim vek a. Gold medal latute hi – Lalruatpuia, Hmunhmeltha; Vanhlimpuia, Tuipui; Laldin-mawia, Tuipui leh Lalthiang-hlimi, Tuipuite an ni a. An pali hian Sub-Junior category-a mi an ni. Sisha, Haryana-ah Inter SAI Championship khelh zui leh a ni dawn a, hemi atan hian Champhai aiawha kalte hian thawhtanni-a Manipur-a selection neih tura tel turin vawiin tlai hian Aizawl chhuahsan in Manipur hi an pan dawn a ni.
…………………………………………………….
Champhaiah rampum huap Exhibition
Nimin khan AMFU Champhai Hqrs. chu an office, CHANEM building-ah an thukhawm.He meeting an pawl president Pu H.Taithuama kaihhruai-ah hian thil pawimawh hrang hrang te an ngaihtuah a. Thla thar September thla tawplam khian Mizoram pum huap Exhibition Champhai-ah buatsaih nise tih an rel a. He exhibition ah hian thlai thar bakah industry lam atanga thil dehchhuah te bakah khawl lam siamtu company te pawhin an khawl te an rawn entir thei dawn niin report a ni. Champhai biala Leilet siam zawl leh siam rem hna thawh, Land Development kalpui mek chu tha leh changtlung taka kalpui a nih theih nan theih ang tawka ngaihven nise, an ti a. Hei bakah hian Bangalore-ah Green House training leh Indo-American Seeds Company ten thlai chi an sawngbawl dan te zirchiang turin palai pahnih in tirh nise, an ti bawk.
…………………………………………………….
I/Day Volleyball khelh tan a ni ta
Nimin atang khan Independence Day Volleyball Tournament leh CDVA Silver Jubilee puala inelna ni bawk chu nimin atang khan Bethel veng Chhura hmunah khelh tan a ni ta a. He tournament-ah hian mipa lamah team 12 leh hmeichhe team 7 an tel a, nimin khan match 7 khelh zawh a ni. Nimin inkhel result chu :-
Kahrawt 0-2 Bethel Red(M)
Tlangsam 2-0 Vengsang (M)
Khuangleng 2-0 Bethel (W)
Kahrawt 2-1 Ngur (W)
Kanan 2-0 Cpi College(W)
Zotlang 0-2 Venglai (M)
Vengthlang 2-0 Cpi College (M)
Vawiin inkhel tur te –
Vengthlang Vs Ruantlang (M)
Kahrawt VS Mualveng (M)
Kanan Vs Kahrawt (W)
Khuangleng Vs Vengthlang (W)
Champhai College Vs Ngur (W)
Tlangsam Vs Electric (M)
Bethel Blue Vs Venglai (M)
Volleyball inelna hi karleh Nilaini (13/8/08) khian final khelh a ni ang a, CHANEM Complex-a CDVA Silver Jubilee Lungphun chu Pu H.Lalchhuanawma, DLAO chuan a hawng dawn bawk.
…………………………………………………….
Training nei dawn
Tun thla ni 19 khian Venglai Community Hall-ah Disaster Management & Rehabilitation Branch, Champhai buatsaihin Champhai district chhunga P/S, M/S, H/S leh HSS zirtirtute pualin training neih a ni dawn a. Training of School Teacher on school safety plan neih tur atan hian nimin atang khan hriattirna pekchhuah tan a ni.
…………………………………………………….
Bus ngaihven
Tunhnaia Champhai tlawha lokal Chief Minister Pu Zoramthanga hnena an lo thlen tawh DC Staff Bus thar neih dan tur buaipui leh hmala turin DC Staff Welfare Committee hruaitute chu tunah hian Aizawlah an cham mek a, Bus thar hi an neih theih thuai an beisei tih thu kan dawng.
…………………………………………………….
I/Day Basketball
Vawiin chawhnu dar 2:00 atang hian Kahrawt Field-ah Independence Day Basketball Tournament chu khelh tan a ni dawn ta.
…………………………………………………….
Famchang
Pu Thanrawia (94) Dawr Veng chu nimin zing dar 2 vel khan an mahni chenna In ah pumna vangin a boral a, nimin khan Vengthlang thlanmualah vuiliam a ni.
…………………………………………………….
Pangang inlar
Phaizawla Leilet buh thahnem tak chu beisei angin a tha chak lo an ti. Hetihlai hian hmun thenkhatah Pangang hmel a lo lang tan leh ta, Leilet neitu tui la nei tha tawklo an la awm bawk.