Ni 7.9.2020 (Thawhtanni)

Get real time updates directly on you device, subscribe now.

π—₯𝗔𝗠 𝗖𝗛𝗛𝗔𝗑 𝗑𝗔𝗑𝗔 𝗑𝗨𝗑𝗑𝗔 π—›π—Ÿπ—”π—‘π—§π—¨ π—©π—˜π—‘π—šπ—§π—›π—Ÿπ—”π—‘π—š 𝗕π—₯𝗔𝗑𝗖𝗛 𝗬𝗠𝗔 𝗣π—₯π—˜π—¦π—œπ——π—˜π—‘π—§ π—₯π—”π—Ÿπ—‘π—” 𝗛𝗨𝗑 π—›π— π—”π—‘π—š :
Champhai Vengthlang YMA President C.Laltanpuia (fam) Kum-46 s/o C. Sualneka (fam), Covid-19 hripui venga Indo-Myanmar ramri hrula rammu, a rammutna atanga Scrub Typhus natna vanga vanduaithlak taka ni 12.8.2020 a thi chhungte hnenah nimin khan Sawrkarin Chief Minister’s Relief Fund for COVID-19 kaltlanga ralna Rs. 1,00,000 chu a nupui H. Lalnuntluangi (Senpuii) hnenah a hlan.
Ralna hun C. Laltanpuia (fam) In, Champhai Vengthlang Rahsi Venga buatsaihah Champhai Bawrhsap Maria CT Zuali chuan sawrkar aiawhin thu a sawi a. Sawrkar leh khawtlang tana mi inpe zo tak C. Laltanpuia ral a ngai ta chu lungchhiatthlak a tih thu sawiin, khawtlang mamawhna zawnah leh tanpui ngai an awmaΒ  tanpui tura thawk chhuak vat thin mi a nihna chuan a hming a put zawh tir hle a ni, a ti a. A thihna chuΒ  a kalsan tak a chhungte leh khawtlang tan mai bakah Sawrkar tan pawh channa nasa tak a nih thu a sawi a. Covid-19 hripui leng dona kawnga a hnathawh ropui tak chu Sawrkarin a hrereng tawh dawn a, khawtlang, ram leh sawrkar anga a hna thawhna zawng zawngte chu hriatreng a ni tawh ang, a ti.
Ralna hun hi R. Lalnghakliana, Project Director, DRDA Champhai chuan a kaihruai a. Lalnunfela Chawngthu, SDO Sadar-in hunserh hmangin ralna hi Esther Leihang, DLAO chuan a hlan a ni. Covid-19 martar C. Laltanpuia (1974-2020) hi Champhai Vengthlang Branch YMA President leh YMA Sub-Hqrs. Champhai a Exe. Committee Member a ni a, eizawnna lamah chuan Govt. G.M Higher Secondary School, Champhai-a Lecturer hna thawk a ni.
Β π— π—œπ—£π—¨π—œ π—›π—œπ— π—‘π—” 𝗧𝗨π—₯π—œπ—‘ π—§π—›π—¨π—£π—˜π—ž 𝗖𝗛𝗛𝗨𝗔𝗛 :
Champhai District Magistrate Maria CT Zuali chuan kar hmasa Zirtawpni khan thupek thar a chhuah a.
He thupeka tarlan dan chuan Covid-19 hri leng mek laka mipui kan him tlanna turin Champhai District pawn khaw dang Covid-19 kai awmna hmun, entir nan, Aizawl leh Containment Zone a puan khua atanga Champhai District chhunga lo haw te chuan Qarantine pumpelh an duh a nih chuan a hnuaia sawrkar rate tarlan ang hian mahni senso hmanga Covid19 test an paltlang hnua Covid Free Certificate an neih chuan Quarantine loh ni se. Hun rei tak Covid-19 hri donaah kan tha leh zung kan lo seng tawh a, nitin eichawp zawngte tana harsatna sutkianna tura he thil hi ruahman a ni tih thupekah chuan tarlan a ni a. Mizoram sawrkarin Covid-19 test man a bithliah hetang hian tarlan tel a ni bawk 1) Covid-19 test duh hrim hrim tan – RT-PCR – Rs. 4500; TrueNat – Rs. 3000 2) Covid free Certificate nei tura test – RT-PCR – Rs. 4500; TrueNat – Rs. 3000
𝗦𝗨𝗠𝗒 π—¦π—˜π—₯π—©π—œπ—–π—˜ 𝗧𝗔𝗑 π—Ÿπ—˜π—› 𝗗𝗔π—ͺ𝗑 :
Covid-19 hrileng vanga hun eng emaw chen Champhai to Aizawl Maxi Cab kal tawhlo chu vawiin atangin an tlan tan leh tawh dawn.
CAMS Executive Comt. chuan Sorkar thupek zawm chungin Driver te chu Covid 19 hrileng kai theihna laka fimkhur turin an chah a. Driver te chu Hand Sanitizer kawl theuh tur leh Passen- ger list leh an phone no. ziahna bu nei theuh turin an ti a. Sumo a zin turte chu mask vuah ngei ngei tur leh tui in tur leh tul dangte mahni intum sa vek turin an ngen bawk. Sumo Driver leh an passenger ten Covid-19 hri an lo kai palh a nih chuan CAMS Welfare in mawh a phur lovang, an ti bawk.
𝗔 π—§π—›π—Ÿπ—”π—ͺπ—‘π—œπ—‘ π—›π— π—”π—œπ—§π—›π—œπ—‘π—šπ—›π—”π—ͺπ—‘π—šΒ  𝗩𝗨𝗔𝗛 𝗧𝗨π—₯ π—¦π—˜π— Β  :
Inrinni khan Champhai District Scouts and Guides te chuan Mask Bank pualin hmai tuamna an semchhuak. Champhai District Bharat Scouts and Guides te chuan Na- tional Headquarters, Bharat Scouts andΒ  Β  Gui des,Β  Β  NewΒ  Β  Del hi ruahmannaa Covid-19 hrileng laka himna tura hmalakna, hmai tuamna sem runpui kalpui mek chu zawmin, Zirtirtute Ni pualin Inrinni zing khan Champhai khawpui chhung Bazar hmun hrang hrangah hmai tuamna 550 an sem chhuak a. He hunah hian Champhai District Bharat Scouts and Guides atangin Unit leader leh Senior Scout & Guide mi 20 an thawkchhuak a ni.
π— π—œ π—§π—Ÿπ—”π—ͺπ— π—‘π—šπ—”π—œπ—§π—˜ π—§π—›π—œπ—¦π—˜π—‘ π—§π—Ÿπ—œπ—‘π—šπ—žπ—›π—”π—ͺ𝗠 848 π—¨π—‘π—œπ—§ :
Β Kumin chhungin District Hospital Champhai Blood Bank-ah mi tlawmngai ten thisen Unit 848 an pe. Champhai District Blood Bank Officer Dr. R. Vanlalchhuangi sawi danin, kumin chhung hian Kohhran hrang hrang Thalai Pawl 10 te chuan District Hospital Blood Bank-a dah turin thisen Unit 307 an pe a, mipa 227 leh hmeichhia 80 te’n an pe.
YMA hmingin Branch pahnih te chuan thisen an pe a, mipa 60 leh hmeichhia 23 te chuan thisen an pe a, Thisen Unit 83 an pe a ni. Kumin chhung hian zirna in hminga thisen pe an la awm lo va, Pawl anga thisen pe erawh panga an awm thung a. Heng pawl panga te hian unit 178 an pe a, mipa 143 leh hmeichhia 35 te chuan thisen hi an pe a ni. Heti hian kumin chhunga Champhai District Hospital Blood Bank-a dah tura Kohhran leh pawl hming-a tlawmngaia thisen pek zawng zawng hi Unit 568 a ni a, mipa 430 leh hmeichhia 138 te chuan thisen hi an pe a ni.
Kohhran leh Pawl anga pek a nih bakah mimal thahnem takin thisen hi an pe bawk a, kumin chhung hian mipa 165 leh hmeichhia 46, an vaiin mi 211 te’n tlawmngaiin thisen hi an pe a. Hei bakah hian Unit 69 chu Blood Bank ah thisen dah khawl sa a awm loh avanga koh chawpa pek niin, mipa 59 leh hmeichhia 10 te’n thisen hi an pe a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More