πππͺπ₯ππ¦ππ£ ππ‘ ππ’ππππͺπ§πππ₯ πππ§π π£πππ§πππ‘π πππ‘ π§π¨π₯ π₯π¨πππ ππ‘ :
Mizoram Sawrkar State Disaster Management Authority-in inthlahdulna dan hnuaia inkaihhruaina a chhuah, Order No. B 13021/101/2020-DMR/Vol-II dated 30.9.2020, Point No. I. A. Sub No. I ah Mizoram luhchhuahna Zokhawthar kaltlang kawngpui chu bungrua leh khualzin phur lirthei tan hawn a ni ang tih a ni a. Hemi dungzui hian Champhai District Magistrate Maria CT Zuali chuan Zokhawthar Gate paltlang theih dan tur nimin khan hetiang hian thupek a chhuah.
Bungrua la lut tur reng reng chuan ‘Bill of Entry’ an nei tur a ni a, Superintendent, Land Custom Station Zokhawtharah an thehlut tur a ni. Bungrua thawn chhuak turte pawhin βShipping Billβ an nei tur a ni. Hemi lehkha nei lo te tan bungrua lakluh leh thawn chhuah khap tlat a ni.
Myanmar atanga mihring rawn lut tur an awm a nih chuan an rawn luh hma karkhatah mCOVID-19 Mobile Application atangin emaw, Incident Commander, BDO Champhai leh Officer-in-charge Zokhawthar Police hnenah an in hriattir hmasa tur a ni. Luh phalna pekte chu Screening neih hnuah Sawrkar Quarantine Facility-ah ni 14 chhung khung hran tur an ni. Thu leh awm hma chuan Free Movement Regime (Intlawh tawn theihna) chu COVID-19 avangin phal a ni rih lo vang.
Myanmar atanga mihring rawn luh phalsakte chuan COVID-19 test, Quarantine Facility awm man, chaw ei man leh motor (vehicle) hman man anmahni senso in an intum tur a ni.
ππππͺππ¨π‘π πππ πππ¨ππ‘ππ§πππ‘π πππ¨π ππ πππ₯π¦ππ§π‘π :
Tunlai favang ruah bawhawk surah Khawbung leh Khuangthing khaw ram chhunga leilet eng emaw zat tuilianin a tihchhiat chu nimin khan Champhai District DAO, George Lalthanngura chuan tlawhin, leilet chhiat dan te an enfiah.
Nimin chawhnu khan Champhai DAO, George Lalthanngura leh Tuipuiral bialtu, MC Lalramenga te chuan tuilianin a tihchhiat Khawbunga Tlangva zau leilet an tlawh a. Tlangva zauah hian Pu Thangzova Leilet, buh tin 150 thar theihna chu tuilian hian buh seng tur awm loa a len chhiat vek bakah leilet bial a hnawl chhe vek a. Pu C. Lalfela leilet thlang zawk buh tin 230 thar thinna pawh tuilian hian a tichhe vek bawk.
Heng bakah hian leilet dang pawh leilet chuanhnuai hnawl chhiat a awm nual a. Leilet biala siam leh tur chuan a hautak hle niin an sawi a. Khawbung Tuiaw zaua leilet pawh tuilianin leilet chuanhnuai a hnawl chhiat a awm nual bawk a; Tuiaw zaua tuilianin leilet a len chhiat dan kimchang hi an la hre thei rih lo a ni.
Khuangthing ramah chuan Tlawva luidunga leilet chuanhnuai eng emaw zat tui lian hian a hrut chhia a, buh seng tlak a awm loh bΓ’kah, leilet bial siam that hleih theih loh khawpa a hrut chhiatte awmin, tui kawng leiminin a chhilh leh tlabal a awm nual bawk a. Buh hi a vui tan tawh a, tuilianin a tihchhiat leh lei minin a chhilh loh laiah pawh buh seng tlak a awm dawn lo niin an sawi bawk.
πππ¨π‘πππ₯ππ‘ πππ§ :
Nimin khan mi 7-in inkhunghranna hmun an chhuahsan a, Champhai District chhunga inkhunghranna hmunah mi 27 an awm mek.
Tun dinhmunah DPRC Institutional Quarantine Centre-ah mipa 4 khung hran mek an ni a; Tourist Lodge Institutional Quarantine Centre-ah mi 9, mipa 8 leh hmeichhia 1 khung hran mek niin, mahni ina inkhung hrang mipa 10 an awm bawk a. Covid Care Centre, Nursing School Building-ah mipa 4 enkawl mek an ni bawk a. Khung hran mekte hi mipa 26 leh hmeichhia 5 an ni.
π₯ππ‘ πππ¨ππππππ₯π‘π πππ‘ :
Champhai District Magistrate, Maria CT Zuali chuan ran khuahkhirhna thupek a chhuah.
Thupeka tarlan dan chuan Eng ran mah a neitu venna tel loin anmahni-a chhuahtir phal a ni lo a; ran neituin a ranvulh vantlang hmunah emaw mimal ramah a chhuahtir tur a ni lo. Ui reng reng a vulhtute’n an kai a nih loh chuan pawn chhuahtir loh tur a ni a, mahni ranvulhin khawlai emaw vantlang hmun emaw a tih bawlhhlawh chuan a neitute’n an thian fai zel bawk tur a ni. Thupek zawm lote chu Dan hmanga hrem an ni ang a, thupek hian chhuah a nih atanga thla hnih chhung a huam ang.
Fai inelna endik ang Swachh Survekshan hnuaiah fai inelna kalpui mek zel a ni a. Hemi hmang hian Veng, School, Office, Hotel/Restaurant, Bazar leh Damdawi in fai ber thlan a ni dawn a; October leh November thla chhungin endiktu atana ruatte’n endik hna an kalpui dawn a. UD&PA Department chuan mipui te faina ngai pawimawh a, mahni awmna hmun theuhte fai taka enkawl reng tura ngenin an hriattir.
ππ§π£ ππ‘ π§πππ¦ππ‘ π£π :
Champhai Holy Cross Parish Catholic Thalai Pawlte chuan Diocese Thalai Ni pualin nimin khan District Hospital, Champhai Blood Bank-ah thisen an pe a, mipa 30 leh hmeichhia 6-in thisen Unit 36 an pe a ni. AVBD leh blood bank-te chuan ram changkang zawkah chuan nun chhanna atan thisen lei a ngaih thin laia hetianga phal taka a thlawna thisen pe an awm thin chu lawmawm an tih thu an sawi a. Kohhran, pawl leh mimal anga thisen hi pek reng theih a nih thu sawiin, thisen pe duhte chuan District Blood Bank pan mai tur leh inthlahrung hauh lo turin mipui te an chah thar leh a ni.
π©ππ‘π§πππ‘π πππͺπ‘ππ£π¨π ππ¨π πππ π§π¨ π§π¨π₯ πππ‘ :
Mipui him zawk nan Champhai-ah Road Protection Squad Committee din a ni.
Champhai khawpui chhunga lirthei insut palh, inhliam palh leh chetsualna te a lo tlem zawk nan Road Protection Squad Committee hi din a ni a. Chairman atan – Sub Divisional Magistrate ruat a ni a; Member Secy. atan – Sub Divisional Police Officer ruat a ni bawk a. Member atan – District Transport Officer, District Urban Development Officer, Settlement Officer, DLAO, DIPRO, YMA Sub.-Hqrs, Champhai President leh PWD, PHE leh P&E dept. E.E.-te ruat an ni a. Ex-Officio atan -Veng tina VC te, YMA leh MHIP hruaitute ruat an ni bawk a ni.
Heng Committee din tharte hi a tul anga hma la turin thuneihna pek nghal an ni bawk.
Comments are closed.