Nimin khan Jal Jeevan Mission (JJM), Champhai District buatsaihin ni 2 awh tur, Training Prog. for Electrician/Pump Operator chu I&PR Auditorium Hall, Chanem-ah buatsaih a ni.
Nimina inzirtirna hunah hian Champhai district khaw hrang hranga ni chakna hmanga tui pump-na hmuna thawkte koh khawm an ni a. He hun hi Julie C. Mawii, Dist. Co-ordinator SBM(G)-in a kaihruai a. Er. C. Lalhmachhuana, SE, PHED, Champhai WATSAN Circle chuan khual lian niin he hun hi a hmanpui a. Khual lian chuan tui kan harsat tawh dante sawiin, hmun sang zawk atanga tui hnianghnar lak tur kan neih tawh loh avangin ni chakna tha leh kawlphe tha hmanga hmun hniam zawk atanga tui lak a ngaih tawh thu a sawi a. Kal khawmte chu JJM-in a tum – thingtlang khua zawng zawnga tui connection pek kawngah an pawimawh tih inhre tur leh, an thil zirte chu thiam duhna thinlung pu chunga zir turin a chah a. A lo thiam sa tawhte pawh a bul thut atanga zir thar leh chu a pawimawh tih hre tur te; an thil zirte chu anmahni khua theuhah a nih tur ang taka hmang thei tur khawpa thiam chian tum turin a chah bawk a. Lui leh lui dung enkawl kawngah faina kan vawn nasat zual deuh deuh a tul tih a sawi bawk.
Er. Zohmingliana, AE, PHED, Champhai Watsan Circle leh Er. J. Kapkima, Executive Engineer, PHED, Champhai WATSAN Division-te’n ni chakna hmanga tui pump dan leh khawl enkawl dan te leh thil tul dangte an zirtir a ni.
An thil zirte a taka hmu a, zir chhunzawm turin vawiin hian Kelkang Solar Pumping Scheme leh PHED Pump House, Champhai-te tlawhpui an ni dawn a. Nimina koh khawmte hi Champhai district-a Solar Pumping Scheme leh Water Pumping Scheme awmna khua, khaw 19-a mite an ni a. Khaw khat atangin mi 3 zel koh niin, mi 56-in zirtirna hun hi an chhim a ni.
Comments are closed.