Nimin khan Khuangleng khuaah Covid-19 hri kai 179 hmuh chhuah a ni a, Ngur khuaah hri kai 108 hmuh chhuah a ni bawk a, nimina Champhai District chhunga hri kai hmuhchhuah hi 311 niin, ni khat thil thua hri kai hmuh chhuah an tam ber tum a ni.
Thawhlehni khan Khuangleng khuaa mahni inringhlel mi 16 te chu Sesih PHC-ah an sample endik niin, mi 15 ten hri an kai tih hmuh chhuah a ni a. Nimin khan Covid 19 hri kai endik runpui kalpui chhunzawm nghal niin, Sample 564 endik atangin hri kai hi 179 hmuh chhuah belh leh a ni a, nimina Sample endik atanga chhutin hri kai hmuh chhuah zat hi za zelah 31.73 a tling phak a ni.
Vawiin hian hri kai endik hi chhunzawm leh a ni dawn a, mi 500 chuang endik hmabak an la nei niin thu dawn a ni a. Tun dinhmunah chuan hri kai te hi ngaihtuahawm lutuk an awm lo a, natna lang chhak (Symptom nei) erawh an thahnem hle a, a tam zawk hi home isolation a kalpui tum niin, na zual bik an awm a nih chuan Champhai lama inenkawl tura lak an ni ang.
Champhai District Hqrs pawn lama hri kai awm lohna khuaahte Biak Ina inkhawm leh Zirna a pangngaia kalpui phal a nih angin Khuangleng khuaah hian Biak ina inkhawm leh zirna In te chu a pangngai veka kalpui a ni a, hetia hri kai hmuh chhuah an pun nasat tak em avang hian Biak Ina inkhawm leh Zirna in a pangngai kalpui chu tihtawp rih a ni.
Nimin khan Ngur khuaah Covid 19 hri kai endik runpui kalpui a ni a, hri kai mi 108 hmuh chhuah a ni bawk. Hei bakah hian Champhai khawpui chhung Kanan Vengah hri kai mi 8,
Venglai leh Vengthlangah 4 ve ve, Zokhawthar leh Bethelah 2 ve ve, Tlangsam, Zion Veng leh Vengsangah pakhat theuh hmuh chhuah a ni bawk a; Myanmar atanga raltlan rawn lut hri kai pakhat hmuh chhuah a ni bawk.
Nimina hri kai hmuh chhuah zawng zawng hi mi 311 a ni a. Heti hian Champhai District chhunga hri kai hmuhchhuah chu mi 3,163 an tling tawh a, nimin thleng khan mi 2303 enkawl dam tawh niin, hri kai enkawl lai mi 860 an la awm mek.
Comments are closed.