NIZUNG CHAKNA HMANGA TUI CHAWI THEI

Get real time updates directly on you device, subscribe now.

NABARD (RIDF-XXV) sum ₹ nuai 459.60 senga nizung chakna hmanga Chalrang leh New Chalrang khuate chawm tur tuilakna siam, Chalrang-New Chalrang Water Supply Scheme chu nimin khan PHE Department changtu Deputy Chief Minister Pu Tawnluia chuan khuallian niin a hawng. He hun hi Pu C.Lalmuanpuia, MLA, Veterinary, Fishery and Sericulture Board Vice Chairman chuan khualzahawm niin a telpui a ni.
Hawnna pual programme Chalrang Community Hall-a neihah Pu Tawnluia chuan thu sawiin, Chalrang leh New Chalrang khaw intawm tur tuilakna hawn a ni ta chu ni chhinchhiah tlak bik tak a nih thu leh a lawmpui takzet thu a sawi a. Tui chu thlaktu awm miahlo, damkhawchhuahna atana kan nitin mamawh a nih avangin tui hnianghnar tak neih a nih theih nan PHE Department-in theihtawp a chhuah a, khaw chhunga tui lakluh bakah in tina pek vek a tum a ni, a ti a. Mipuite chu tuilakna enkawl leh venhim hna Department kuta dah mai lova neitu nihna pu a enkawl turin a fuih a, tuihna siamtu ramngawte humhalha venghim thin turin a chah bawk.
A bial chhunga tuilakna siam mek leh hmachhawp hrang hrangte tarlangin, khaw tinin kum hnih khat chhungin tui kham khawp an hmuh vek theih nan hmalakna chak taka kalpui chhoh mek zel a ni, a ti a. Kum hnih dawn hrileng vanga buai karah duh anga hmasawnna thawh theih a nih loh thu leh hrileng kara dam khaw chhuah nana sawrkar tawiawmtu khawtlang hruaitute, NGO, Kohhran leh khawtlang mipuite tanrualna chu fakawm a tih thu a sawi a. A bial chhung mipuite atanga hmangaihna, duhsakna leh chawimawina a dawng thin chu ropui a tih thu sawiin, bial chhung chei leh tihhmasawn kawngah an tawiawmna leh thlawpna a ngen nghal bawk.
SEDP Executive Board Chairman ni bawk chuan 2022-2023 financial year atangin Sawrkar flagship programme SEDP kaltlangin kuthnathawktute tan theihtawp chhuah tum a nih thu sawiin, a thawhkhat nan ₹ 50,000 a bultan tum niin chhungkaw 60,000 thlan chhuah hmasak tum a ni, a ti a. MLA bial tinah chhungkaw 1,500 zel thlan phawt tum a ni tiin, a thlangtu turte chu khua leh district level thlenga siam a nih tur thu a sawi bawk a. A bial chhung chu Mizorama thei leh thlai hrang hrangte chin tamna leh thar chhuah tamna a ni chu chhuanawm a tih thu sawiin, thalaite chu zirna bakah intodelh tuma theihtawp chhuaha hnathawh hrehlo turin a fuih a, an mamawh leh tul angte sawrkarin a ngaihtuah sak zel dawn thu a sawi a. Puih ngai leh puih tlak khaichhuah kawngah sawrkarin theihtawp chhuah zel a tum thu a sawi bawk.
Khualzahawm Veterinary, Fishery and Sericulture Board Vice Chairman Pu C.Lalmuanpuia chuan bialtu MLA Deputy Chief Minister hmalaknaa tuilakna tha tak hawn theiha peihfel a ni leh ta chu lawmawm tiin, Chalrang leh New Chalrang khaw mipuite a lawmpui thu a sawi a. Department hmalakna leh inpekna fakawm tiin, hrileng vanga hun khirh tak tawh a nih avangin sum leh pai harsatna tam tak a awm thu leh hemi karah theihtawp chhuaha hmasawnna ruhrel leh rahbi siam hna kalpui chhunzawm zel a nih thu a sawi a. Sawrkar flagship programme SEDP sem chungchangah ruahmannate kalpui chhoh mek zel a nih thu sawiin, tum leh duh angin a hmaa ruahmana neihte ti thei dawn lo mah ila theihtawp chhuaha SEDP kalpui tura ruahmanna siam a ni, a ti bawk. Ram tana tih theih ang tawkte tha taka hlen chhuah tum theuh turin kalkhawm mipuite a sawm a ni.
Hawnna pual inkhawm buatsaih hi Er. F.Liantluanga, Chief Engineer, Zone-II, PHE Department chuan a kaihruai a. Upa Sawrkarliana Sailo in hunserh a hmang a, Er. C.Lalhmachhuana, SE, Champhai WATSAN Circle-in technical report a pe a. Chalrang VCP Pi Lalchhuanawmi’n lawmthu sawiin hun a khar a ni.
Chalrang-New Chalrang Water Supply Scheme (Solar pumping) hi July ni 2, 2020 khan bul tan niin, April ni 30, 2023 a zawh hman tura tih chu April ni 30, 2021 khan zawhfel a ni a. Tui connection 299, Chalrangah 164 leh New Chalrangah 135 pek chhuah niin, PHED/P&V Eastern Engineers chu Implementing Agency an ni.
Chalrang-New Chalrang Water Supply Scheme hi mi pakhatin nikhatah tui litre 55 zel hmang anga chhutin mi 1567 te kum 30 lo la awm leh tur thleng chawmzo tura duan a ni a. Tui pump chhuahna lui atanga tuidahkhawlna tuizem lian Chalrang khaw lu a awm insanhleihna hi metre 481 a ni a. Nikhatah darkar 7 chhung tui pump thei tur leh nitin tui litre 68,530 pump thei tura duan a ni. Tui hi Sakeithingham leh Ramri Lui atanga gravity hmanga lakkhawm hmasak hnuah nizung chakna hmanga pump chhuah a ni a. Tuilakna pipe hi 65 mm diameter GI pipe niin tuilakna thui zawng hi kilometre 3 a ni a, Chalrang khuaa tuizem litre 40,000 a lianah chhung lutin hemi atang hian 40 mm diameter GI pipe hmangin New Chalranga tuizem thar siam litre 1,00,000 dawngah pekchhuah a ni bawk.
Tui pump chhuah nan hian Pumping Station 2 siam niin, avaiin Solar Power Plant 63.65 KW bun a ni a, hemi atan hian Solar Plate 190 dah a ni. Tui dahkhawlna tuizem pahnih litre 40,000 leh litre 1,00,000 dawng Solar Plant-ah te hian siam tel a ni a, Control room 2 leh a panna kawng pawh siam tel a ni bawk. A enkawlzui hna hi Contractor ten kum 5 chhung an thawk dawn a, hemi hnu hian a enkawlzui zel hna chu Village Water & Sanitation Committee kutah a awm tawh dawn a ni.
Deputy Chief Minister hian nimin vek khan New Chalrang, Lungtan leh Khawhai khuate tlawhin khawtlang mipuite hmaah thu a sawi a. Mamawh leh harsatna an thlente a ngaihthlak sak a, a tul anga hmalak theih dan turte ngaihtuahho a ni.
Deputy CM hi Pu C.Lalmuanpuia, MLA, Vice Chairman, Veterinary, Fishery and Sericulture Board; Pu H.Lianzela, Director, UD&PA; Pu C.C. Lalchhuangkima, DC, Khawzawl; Pu J. Liantluanga, Chief Engineer, Zone-II, PHED; Pu C.Lalhmachhuana, SE, Champhai WATSAN Circle; Pu Lalringliana, Addl S.P, Khawzawl leh Official dangten an tawiawm a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More