Champhai District Bawrhsap Maria CT Zuali chuan, Mizo ten kan neih thil hlu tak tak, thing leh pangpar te, buh leh thlai te bakah nungchate humhalh hi kan culture ah hian hnuklut ila, nungchate kan humhalh that chuan thing leh mau ah kan hausa reng dawn a ni, a ti.
Nimina Govt. Champhai College Multipurpose Hall-a Pawl Kut lawmna hun hawngin Champhai District Bawrhsap Maria CT Zuali chuan he thu hi a sawi a. Pawl Kut hi kut hna kan thawh zawha hman tura lo awm a nih thu a sawi a, Kristianna kan ramah a lo luh hnu hian Mizo in Kut hrang hrang kan neih te chu dik lo deuha hriatna lo awmin a nihna ang pawhin kan hmang meuh tawh lo a. Kristiante kutpui Krismas ah a hlawmin kan lawm ta ber thin a, chu chuan Krismas ah zu leh ruihhlo dang a tihluar zual tih sawiin, pawi a tih thu a sawi.
Khuallian chuan Pawl Kut hi nasa taka hmang turin Champhai hi a inhmeh tih sawi chhunzawmin, kut hnathawktu te’n an hna an zawh hnuah he Kut hi hlim taka hmang ho a, an thlai leh buh tharchhuah te pholanna hun siam a chakawm tih a sawi a. Mizo pipute sulhnu tamna chu Champhai District a nih avangin, heng pipute sulhnu te chawi nun zel nan kan Kut neihte hi hman tangkai a tul tih a sawi bawk.
Bawrhsap chuan Azadi Ka Amrit Mahotsav chuan a tum ber chu, heng Kut kan neih hrang hrangte hi hlim tak leh zalen taka hman a nih thu a sawi a. Kum lo thar leh zel turah chuan kut hnathawktu te’n an hna thawh zawh hlim taka an lawm theih nan Pawl Kut te hi zau zawk leh hlimawm zawka hmang tura hmalak thar ni se a duh tih a sawi a. Hmanlai pi leh pute lawm dan ang taka hlim taka lawm dan tur ngaihtuah a tul tih a sawi bawk.
He hun hi Zosiamkimi Tlau chuan a kaihhruai a, Zothanglawra, District Librarian & Convener Azadika Pawl Kut chuan kalkhawmte chibai bukna leh inhmelhriattirna hun a hmang a ni.
Comments are closed.