Nungcha Humhalhna Hapta, ’68th National Wildlife Week- 2022′ October ni 2 atanga ni 8, 2022 chhung awh tur hmanna kal zelah nimin chawhnu khan Environment, Forest & Climate Change Department, Champhai Forest Division bultumin Hnahlan Community Hall-ah nungcha humhalh a pawimawhzia inzirtirna hun buatsaih a ni.
Lalduhthlana, DFO Champhai Forest Division chuan thu sawiin, nungcha humhalh pawimawhzia te, nungchate tihlumtu leh tiduhdahte hrem an nih dan te, nungcha humhalhna dan chi hrang hrang leh a kaihhnawih te a thlalak hmangin a sawi fiah a.Mipui kalkhawmte chu Pathianin duh taka a siam nungchate leh an chenna ramngaw tichereutu ni lo va, venghimtu ni theuh turin a sawm a ni.
Champhai District Honorary Wildlife Warden Lalhlupuia chuan, Sik leh sa inthlak danglamin nungchate a nghawng buai dan sawiin, khawvela kan chenpui, kan tana tangkai em em nungchate leh an chenna ramngawte venghima, humhalhtu ni theuh turin kalkhawmte a sawm a. Khawvelah hian thing leh mau, nungchate hi awm lo ta se, keini mihringte tan dam khawchhuahna tur a awm bik lo a ni, a ti.
Phairothianga, Hnahlan Joint YMA President pawhin he hunah hian thu sawiin, Zirlaite chu YMA in hma a lak mek, ruihhlo do leh nungcha humhalh tipuitlingtu ni turin a sawm a ni. He hun hi Lalremruata Cherput, VCP Hnahlan chuan a kaihruai a. Hnahlan Forest Range Officer, Lallianvunga’n lawmthu sawiin he hun hman hi a khar a ni.
He hunah hian Hnahlan khuaa Middle School chin chunglam, High School leh Higher Secondary Sikul zirlaite bakah VC, YMA, MHIP leh MUP hruaitute an tel a ni.
Comments are closed.