Nimin khan Champhai Police-te chuan SP Conference Hall-ah, SP Lalrinpuia Varte hovin Crime Review Meeting an nei a, Kum 2020 January atanga October leh kum 2021 January atanga November thla chhunga Champhai District chhunga thubuai ziah luhte khaikhinin thlir ho a ni a, case la chinfel lohte sawiho a ni bawk.
Lalrinpuia Varte, SP chuan, Kum 2020 aia kum 2021 chhunga thubuai ziah luh a tlem zawk chu lawmawm a tih thu sawiin, Police Officer te chu thubuai an chhuinaah thil tisualtu ten hremna an tawh piah lamah simna an neih theih nana tang zel turin a fuih a. Sualna chi hrang hrang, ruihtheihthil leh sawrkar phal loh dona kawngah mipui te chu Police tawiawm chhunzawm zel turin a sawm bawk a ni.
SP chuan tun laiah Online sextortion a hluar hle tih sawiin, mipate video call hmangin thiam taka bum thin niin pawisa pek phutin Social media-a thlalak vawrhdarhah an vau thin, a ti a. Hetiang laka kan him theihna turin Social media hman reng rengin mahni mimal tana pawi tur video, thlalak leh message te thawn lo tura mipui chahin, hmel hriat loh video call leh message chu bengkhawn lo tawp turin a chah bawk.
SP Lalrinpuia Varte chuan, Kristiante hunpui Krismas leh Kum thar vuakvetah sawrkar phal loh halpuah, halmawi, Sky Lantern leh Silai lem a mu kap chhuak thei te hmang lo turin Champhai mipui a ngen bawk a ni.
Crime Review Meeting-ah hian C. Lalengliana, Addl. SP tarlan danin Kum 2020 chhung khan thubuai 145 (IPC 96 leh Non IPC 49) ziah luh a ni a. Kum 2021-ah thubuai 104 (IPC 42 leh Non IPC 62) ziah luh a ni. Kum 2020-a thubuai ziah luh aiin Kum 2021 chhunga case ziah luh hi 41 (Za zela 28.27) in a tlahniam a, IPC case ziah luh hi 54 in tlem zawk mah se, Non IPC erawh chu 2021 hian case 13 in a tam zawk thung a. Non IPC case a tamna chhan hi ND&PS leh MLP Act hnuaiah case ziah luh a pun vang a ni tih tarlan a ni.
Covid 19 venna atana Sawrkar inkaihhruaina bawhzuinaah kum 2021 January atanga October thla thlengin mi 1794 man tawhin an pawisa chawi tlingkhawm hi Rs. 4,22,000 a tling tawh a. Heroin KG 3.989 Rs. Nuai 157.5 hu manin Methamphetamine mum 1,20,100 – Kg 13.225 a rit, Rs. Nuai 358.42 hu an man tawh bawk. Dan lova Myanmar atanga tawlh ruk kuhva rah ro Bag 930 – Kg 85,790 a rit Rs. Nuai 173.81 hu leh Dan lova tawlh Leichi Bag 7,280 – Rs. Nuai 51.486 hu an man bawk a. Kumin 2021 chhungin Lirthei dan bawhchhia 393 man tawh niin pawisa chawi tlingkhawm hi Rs. 1,63,000 a ni.
Crime Review meeting hi Sylvie Z. Ralte, Addl District & Sessions Judge, Champhai chuan telpuiin Champhai Police te chu Case chhuina kawngah fimkhur leh uluk taka thawh a ngaihzia sawiin sualna dona kawngah theihtawp chhuah zel turin a fuih bawk a ni.
Comments are closed.