Ni hnih awh tur Pangpar phochhuahna leh zawrhna hun ‘Champhai Flower Show & Fair 2021’ chu nimin chawhma dar 11 khan Pi Maria C.T Zuali, Champhai DC chuan CHANEM Building-ah khuallian ni a hmanpuiin a hawng.
Horticulture Department leh Champhai District Florists Association (CDFA) te tangkawp buatsaih Champhai Flower Show & Fair 2021 hawnna hunah Bawrhsap Pi Maria C.T Zuali chuan thusawiin, pangpar chuan nun a tihlimin khawvel leh khawtlang a timawi em em a ni, a ti a. Pangpar mawi tamna leh vulna hmun, mite tlawhchak tak khua ni thei turin pangpar khawi leh chin kawnga tui mite tan la zel turin a fuih a. Pangpar khawitute mai bakah mi dangte pawh pangpar khawi uar sauh sauh turin a chah a. Champhai Flower Show & Fair 2021 hlawhtling leh zawngchhang tlak tak neih a nih theihna tura duhsakna hlanin a hawng a ni.
Champhai Flower Show & Fair 2021 hawnna hun hi Pu B. Lalzarzova, District Horticulture Officer (DHO) chuan a kaihruai a. Pi C. Darthangpuii, Secretary, Champhai District Florists Association (CDFA) chuan report pe in, CDFA hruaitute inhmelhriattirna a nei nghal a ni.
Champhai Flower Show & Fair ah hian Stall 14 awmin, Pot Flower-ah mi 21 in pot 49 an phochhuak a, House plant-ah mi 28 in pot 54 an phochhuak bawk a. Flower arrangement-ah mi 14 in pot 22 phochhuakin, Bonsai ah mi 15 in pot 43 an phochhuak bawk a. Heng bakah hian Pot, Thlai chi, Pangpar leitha, Pangpar chi hrang hrangte leh a dangte zawrh chhuah a ni.
Comments are closed.