Mizo zingah Nau piang pung chak lovin ram leh hnam, sakhuana dinhmun a tihderthawng mek nia a lan avangin, Khawbung Pastor Bial kohhran hrang hrangah Pian Pun Inzirtirna hun hman a ni.
Khawbung Pastor Bial Inkhawmpui 2022 in a lo rel tawh angin, Pian Pun Inzirtirna neih ni se a lo tih chu nizan hmasa atang khan neih tan a ni a. Mizoram Synod atanga zirtirna pe tura ruat, Upa Dr KC Vannghaka’n nizan hmasa khan Khawbung Kohhranah hun hmangin, Rev. Lalengzauva’n Zawlsei Kohhranah, nimin khan Khuangthing Kohhran leh Khuangthing Hmar Veng Kohhranah hun hman chhunzawm leh niin, nizan khan Khawbung leh Zawlseiah inzirtirna hi kalpui chhunzawm leh a ni.
Zirchianna tarlan danin Mizoram chhunga mihringte chu pung angin lang mah se, Mizo mipuiah erawh pian punna leh mitthi chhut kawpin Mizo mipui punna chu tih tham a ni lo a. Hei hi ram leh hnam, sakhua dinhmun tiderthawng mektu a nih avangin fa 5 aia tlem lo, thangthar nupaa insiam mek leh insiam tur te’n an neih loh chuan dinhmun hlauhawmah kan ding thei niin a tarlang a ni.
Comments are closed.