Champhai District NGO-CC chuan National Highway No. 6 Khankawn leh Zokhawthar inkar kawngpui chu a nihna tura kalpui loha a awm reng chuan Legal Court ah PIL File nise tiin an rel.
Nimin-a Champhai District NGO Coordination Committee an Pisa, Champhai Venglai-a thukhawm chuan Champhai khawpui enkawlna tura Municipality ruahmanna chak zawka kalpui a nih theihna turin Mizoram Sorkar hotute hnenah a tul anga bawhzui ni se, tiin an rel a.
Champhai (Khankawn) to Zokhawthar kawngpui, hmun thenkhata la zawh fel loh Magisterial Enquiry neih a nih hnu pawha vawiin thlenga bawhzui loha a awm chu, a hmunah kala enfiah leh ni se, an ti a. He kawngpui hi a nihna tur anga kalpui loha a awm reng chuan Legal Court ah PIL File tura inbuatsaih nise tiin an rel a. Champhai District-a Mobile Phone Service chhe lutuk chu tun thla ni 19 chawhnu Dar 1:00 ah Champhaia tlawmngai pawl hrang hrangte nen Champhai press club ah sawiho ni se. Hetah hian Service provider aiawhte pawh tel ve tura sawm ni se, an ti bawk.
NGO-CC chuan Champhai to Khawzawl, NH No.6 Balaji Company in an sial mek chu, tun thla ni 27-ah a hmunah kalchilhin leivung an paih dan leh retaining wall an siam dante uluk taka enfiah ni se, an ti. Keilungliah khuah mek, hna za zela 95 vel zo tawh nia an sawi pawh hun remchang hmasaberah Chanchinbu mite nen a huhova en ni se. He hna thawk mektu SS Construction Company leh PHED hotute nen a hun tur chu la ruahman leh ni se, an ti bawk.
NGO-CC chuan Hmunhmeltha khuaa All India Radio Station, hun rei tawh tak atanga din ni tawh, vawiin thlenga a taka function lohva awm chu NGO-CC chuan pawi a tiin, hemi chungchang hi Mizoram MP pahnihte hnenah thlenin, a taka function a nih theihna tura hma la turin ngen ni se, an ti a. Champhai a DDK Relay Centre tihtawp lailawk chu tunhma anga kalpui a nih leh theihna tura hma la turin Mizoram MP pahnihte chu ngen ni se, an ti bawk.
Comments are closed.