Champhai District Education Committee (DEC) thukhawm vawi 34-na chu nimin chawhnu dar 3:30 khan an Chairman, Pu James Lalrinchhana, District Bawrhsap hovin Education Training Hall, Champhaiah neih a ni.
District Bawrhsap Pu James Lalrinchhana chuan Committee pawimawh tak, District Education Committee thutkhawm chu a zing thei anga neih a tul thu sawiin, hmalakna inhriatpui tawn leh infinchhuah tawn a tul thu a sawi a. Zirna, hriselna leh infiamna chu lak hran theih loh leh hlamchhiah bik neih theih loh a nih thu sawiin, inkawp tlat an nih avangin heng zinga pakhat emaw pawh hi ngaihthah thiang lo a ni, a ti a. DEC ah tawn hriat ngah leh thiamna hrang hrang nei an awm chu lawmawm tiin, district chhunga zirna leh a kaihhnawihte nung taka kalpui a nih theih nana theihtawp chhuahpuiah member-te a sawm a ni.
Member Secretary Pu T.T Laltanpuia, DEO & DPC, Samagra Shiksha, Champhai District hnen atangin thutkhawm koh chhan leh report tlangpui ngaihthlak a ni a. Pu H. Lalhminghlua, Addl. DPC, Samagra Shiksha-in DEC School tlawh report kimchang a pe bawk.
He hunah hian School hmasawnna tura pawimawh tak School Management Committee (SMC)/ School Management & Development Committee (SMDC) te tana training buatsaih dan tur sawiho a ni a. Khawbung Block tan September ni 20-21, 2022 leh Champhai Block tan September ni 27-28, 2022 chhung hian neih ni se tih a ni a, program kimchangte pawh duan nghal a ni a. September thla chhung vek hian RBSK hnuaia School Health Programme kaltlangin Primary School 24-ah health check up kalpui ni se tih a ni a. School hrang hranga PM Poshan kalpui dante enfiah turin District Project Officer leh Staff-te beisei an ni a. Ministry of Human Resource Development-in Samagra Shiksha hnuaia State hrang hrangte hmalakna leh hnathawh thlalakte enna tura a duan, Shagun Portal tangkai taka hman dan turte sawiho a ni bawk.
Thukhawm-ah hian July ni 12, 2022 a District Education Committee hminga Champhai khawpui chhunga zirna in hrang hrangte tlawha zirchianna neih report ngaihthlak a ni a. Hmalak ngaihna leh tihhlawhtlin dan turte sawiho a ni a. September thla chhungin DEC hminga zirna in dangte pawh tlawh leh ni se tih a ni a. Zirtirtute Ni, September ni 5, 2022 a lawm dan tur chungchangte pawh rel niin, School tinah hman ni se tih a ni a. School ten an remchan danin hmang theuh se, SMC/SMDC te hnenah hma la tura ngenna siam ni se tih a ni a. DEC Chairman hnen atanga thuchah siam ni se tih bakah khawlai hulum laiah banner tarchhuah ni se tih a ni a. Mizoram Middle School Zirtirtu tha ber State Awardee Pu F.Lalramliana, Headmaster, Zawlsei Middle School, DEC hminga lawmpui dan tur chungchang pawh sawiho a ni bawk.
Hrileng vanga hun engemawchen kalpui theih tawh loh formal education zinga tel, Scouts & Guides leh Extra Curricular Activities dang hrang hrangte nung taka kalpui a nih leh theih nan District Level Committee tharthawha hmalak leh ni se tih a ni a. School Education Department hnuaia Pipe Band din thar leh tha tih a ni bawk.
Comments are closed.