March ni 30 a Champhai a buhfai lem nia hriat, Laboratory lian zawk a endik tura Phai lama thawn chu thla khat a liam hnuah pawh result hriat theih a la ni lo.
Hemi chungchanga zawhna chhangin Food & Drugs Administration, Dy. Safety Commissioner Lalsawma chuan, buhfai sample endik tura an thawnna, Assam State Public Health Laboratory ah endik tur an ngah thin deuh avangin a hmasak dan indawtin an kalpui thin tih a sawi a, hei bakah hian thil chhe hma chi an ngaihpawimawh hmasak thin thu a sawi a. Buhfai endik tura an thawn erawh chu thil chhe mai thei lo a nih avangin ngaih pawimawh hmasakah an dah lo nia an ngaih thu a sawi a. Assam State Public Health Laboratory chu hmarchhak state zingah a lian awm chhun a nih avang leh, mahni a Laboratory nei inti te pawhin an endik theih chin a tam loh avangin Legal Sample te chu he Laboratory ah hian thawn khawm thin a nih thu a sawi a. He lam atanga thunun theih an nih loh avang hian hmanhmawh taka result hriat zung zung pawh a theih ta thin lo a ni, a ti. Dy. Safety Commissioner chuan, Champhai a buhfai rinhlelhawm ang chi chu zuar chhuak lo turin Mizoram pumah hriattirna tihchhuah a ni a, hmun thenkhatah pawh heng buhfai ang hi hmuh a ni a, zuar lo tura hrilh nghal vek an nih thu a sawi.
Comments are closed.